नेपाल निजामती कर्मचारी संगठन प्यूठानले स्थापना दिवसको अवसर पारेर मृगौला पीडितलाई आर्थिक सहयोग गरेको छ ।

संगठनको ३५ औँ स्थापना दिवसको अवसरमा संगठनका सदस्य प्यूठान नगरपालिका ५ ढुंगेठाटीका ओबीराम बुढाकी २९ वर्षीय छोरी रोशनी बुढाको उचारको लागि ११ हजार २ सय २० रुपैयाँ सहयोग गरेको हो ।

संगठनका सदस्यबाट संकलन गरेको रकम उनको उपचारका लागि प्यूठान नगरपालिका अध्यक्ष सिताराम केसी मार्फत हस्तान्तरण गरिएको संगठनले जनाएको छ। रोशनीको काठमाण्डौ स्थित मार्क इन्टरनेश्लन किड्नी सेन्टरमा उपचार भइरहेको छ ।

यसैबिच संगठनले प्रकाशन गरेको २०८२ सालको क्यालेन्डर आईतबार बिमोचन गरिएको छ । प्रदेश सांसद तुल्सीराम शर्माको प्रमुख आतिथ्यतामा प्यूठान नगरपालिका ४ नयाँबजारमा कार्यक्रम गरि बिमोचन गरिएको हो। नेपाल निजामती कर्मचारी संगठन प्यूठानका अध्यक्ष रामबहादुर बस्नेतको अध्यक्षतामा भएको कार्यक्रमको संचालन सचिब बसन्त प्रसाद पोख्रेलले गरेका थिए ।