सालघारी गाउँलाई कालोपत्रे सडकले जोडदै छ । चेरनेटा–सालघारी–धाईरेचौर सडकको चेरनेटा–सालघारी खण्ड कालोपत्रे भएसंगै प्यूठान नगरपालिका १ सालघारी गाउँ कालोपत्रे सडकसंग जोडिन लागेको छ ।

प्यूठान नगरपालिकाबाट प्रदेश समपुरक अनुदान अन्तरगत २ करोड ६० लाखमा कालोपत्रे भईरहेको छ । आर्थिक वर्ष २०८०/०८१ मा ७० लाख, २०८१/०८२ मा ७० लाख र ०८२/०८३ मा १ करोड २० लाखको काम भएको प्यूठान नगरपालिकाका प्राविधिक अधिकृत दिनेश केसीले बताए । उनका अनुसार अव कालोपत्रे सडक सालघारी बस्तिमा पुग्न १ किलोमिटर दुरी बाँकी छ ।

उक्त सडकमा सडक डिभिजन मार्फत पनि संरचना निर्माणको काम भएको छ । एक वडा एक कालोपत्रे कार्यक्रम अन्तरगत वडा नं. १ को चेरनेटा सालघारी सडक कालोपत्रे भएको प्यूठान नगरपालिकाका मेयर विष्णु बहादुर योगीले बताए ।

नगरपालिकाद्वारा कालोपत्रेकोे अनुगमनः
सडकको कालोपत्रे कार्यको अवस्था र गुणस्तरका विषयमा नगरपालिकाले अनुगमन गरेको छ । प्रमुख प्रशासकीय अधिकृत कमल प्रसाद भुषाल, प्रवक्ता सुमनराज श्रेष्ठ, वडाअध्यक्ष साधना राउत, कार्यपालिका सदस्य सुनिल सापकोटा, प्रशासकीय अधिकृत चन्द्र बहादुर जिसी, प्राविधिक अधिकृत दिनेश केसि सहितको टोलिले अनुगमन गरेको छ । भौतिक पूर्वाधार योजनाको अनुगमनलाई थप ब्यवस्थित गरिएको प्रमुख प्रशासकीय अधिकृत भुषालले बताए ।