श्रीमान–श्रीमती दुबै जना मिस्त्री काम गर्छन् । ललितपुरको पुल्चोकमा उनीहरूको आफ्नै मोटरसाइकल वर्कसप छ । नारायण पुरी र मालती पुरी श्रीमान–श्रीमती हुन् ।

मालतीलाई मिस्त्री काम उनकै नारायणले सिकाएका हुन् । श्रीमानलाई पनि सहयोग हुने बुझेर आफूले पनि मिस्त्री काम सिकेको मालती बताउँछिन्।

पछिल्लो १५ वर्षदेखि यो जोडी सँगसँगै मिस्त्री काम गर्दै आएका छन् । अहिले भने मालती पनि नारायण जतिकै मिस्त्री काममा पोख्त छिन्।
श्रीमतीले पनि मिस्त्री काम सुरू गरेपछि आर्थिक रूपमा समेत सहज भएको बताउँदै नारायणले दुबैको कमाइबाट पुल्चोकस्थित नःटोलमा घर बनाएको बताए।

श्रीमान–श्रीमती नै यो पेशामा आवद्ध भएको देखेर धेरैले हौसला दिने गरेको उनीहरू बताउँछन्।