२०७८ पुष २८, प्यूठानरोजगारका लागि यमकर्ण बहादुर नेपालीले स्वदेश देखि विदेशसम्म धेरै ठाउँमा धाएका छन् । छिमेकी मुलुक भारत यिनका लागि पानी पँधेरो जस्तै भयो । कामका लागि जान्थे केहिँ कमाएर घर आउँथे । सिप बिनाको कमाइले घर गुजाराका लागि कठिन हुन्थ्यो यिनलाई ।
अहिले ४१ वर्षका पुगेका नेपाली घरको आय व्यवस्था सुधार्नका लागि खाडी मुलुक पनि गए । खाडी मुलुकममा १२ वर्ष बिताएका यिनलाई जहाँ गयो सोचेजस्तै कमाइ हुन सकेन । कोभिड–१९, का कारण घर आउन नसक्दा खाडी मुलुकमै ४ महिनासम्म लकडाउनमा फसेको बताउँछन् यिनले । ‘जसोतसो स्वदेश फर्केपछि अब बिदेश नजाने सुर गरे’, ‘१७ वर्ष घर बाहिरै बितेछ, मैले सोंचे अब गाउँम इलम गर्छु ।’ उनका अनुसार नेपालीले प्यूठान नगरपालिका ३ सापडाँडामा न्यु रोशन कृषि तथा पशुपंक्षी बङ्गुर फर्म स्थापना गरेका छन् ।
फर्म सञ्चालनको लागि ८ लाख रुपैयाँ लगानी लागेको उनी बताउँछन् । फर्ममा दर्भानबाट विदेशी ड्यूरोक जातको ६ वटा बंगुर खरिद गरि पालेका छन् । ‘फर्म सञ्चालनमा ल्याएको १ वर्ष भइसक्यो’, उनले भने, ‘बजारमा बङ्गुरको मासु र यसका पाठापाठीको माग बढ्दो छ ।’ माग अनुसार आफूले मासु र पाठापाठी पु¥याउन नसकेको नेपालीको भनाई छ । नियमित आम्दानी नहुने भएपनि मासिक सरदर २५ देखी ४० हजारसम्म बचत गर्दै आएको उनको भनाई छ । उनले १ वर्षमै १८ वटा बङ्गुरको पाठापाठी र ३ क्विन्टल भन्दा बढि मासु बिक्री गरिसकेका छन् । हाल उनको फर्ममा १८ वटा बङ्गुर छन । दिनको ५ घण्टा बङ्गुरको स्याहारमा बिताउँछन उनले ।
उनले यति मात्र होइन, बंगुरको मल सदुपयोग गर्दै २ वटा टनेल घर बनाएर टमाटर खेती समेत गर्दै आएका छन। २ वटा माछा पोखरी समेत बनाएका छन । मङ्गुर जातको माछा पनि पालेका उनी यि सबै काम यूट्युबमा राखेका भिडियो हेरेर आफै काम सिक्दै आएका हुन् ।
उनी भन्छन, ‘जहा इच्छा त्यहाँ उपाय, मान्छेले दुख नगरी सुखको अनुभुति गर्नै सक्दैन ।’ उनी थप्छन, ‘मेहनत गरेपछि विदेशमा मात्रै हैन नेपालमा पनि केहि गर्न सकिन्छ भन्ने थाहा भयो । केहि छैन भनेर निरास हुनुभन्दा आफु पनि व्यस्त हुने र आफ्नो परिवारलाई पनि व्यस्त बनाउन जान्नु नै सफलता प्राप्ती हो ।’ बङ् गुरले वर्षमै ३ पटक पाठापाठी दिने भएकोले यसको व्यवसाय राम्रो रहेको उनले बताए ।
ड्यूरोक जातको बङ्गुरले पहिलो पटकमा ८ देखि ९ वटा पाठापाटी दिने र दोस्रो पटकबाट ९ देखि १२ वटासम्म पाठापाठी दिने नेपालीले बताए ।उनको परिवारमा उनी, उनकी श्रीमती, एक छोरा र एक छोरी गरी ४ जनाको सदस्य छन । अहिले घर गुजारा र परिवारको आर्थिक स्रोत यहि फर्मबाट चल्दै आएको छ ।
