विश्व क्षयरोग दिवसको अवसर पारेर जिल्ला स्वास्थ्य कार्यालय प्यूठानले जिल्लाका सञ्चारमर्कीहरुसंग अन्तरक्रिया कार्यक्रम गरेको छ । बिराट नेपाल मेडिकल ट्रष्ट (BNMT) र कपिलवस्तु इन्टिग्रेटेड डेभलपमेन्ट सर्भिसेज (KIDS) नेपालको सहयोगमा शुक्रबार बिहान कार्यक्रम गरिएको हो ।
जिल्ला स्वास्थ्य कार्यालय प्यूठानका निमित्त कार्यालय प्रमुख मधुसुदन खड्काले नेपालभरमा र प्यूठान जिल्लामा क्षयरोगी बिरामीको अवस्थाबारे जानकारी गराएका थिए ।

नेपालमा क्षयरोगबाट प्रत्येक दिन झन्डै ४७ जनाको मृत्यु हुने र १ सय ९० जना नयाँ क्षयरोगी थपिने तथ्यांक रहेको उनले बताए । नेपालमा हाल क्षयरोगका १ लाख १७ हजार बिरामी छन् । यस्तै बर्सेनि क्षयरोगका ६९ हजार नयाँ बिरामी थपिने र १७ हजारको ज्यान जाने गरेको छ  । डब्लूएचओका अनुसार बर्सेनि विश्वमा १ करोड व्यक्तिलाई क्षयरोगको संक्रमण हुन्छ । हरेक वर्ष यो रोगले १५ लाख जनाले ज्यान गुमाउँछन् । क्षयरोग ब्याक्टेरियाको संक्रमणका कारण हुने सरुवा रोग हो । क्षयरोगका कारण सामान्यतया फोक्सोमा संक्रमण हुन्छ । क्षयरोग लागेका बेला खोकीसँगै खकारमा रगत, छाती दुख्ने, तौल घट्ने, कमजोरी हुने, ज्वरो आउने र राति पसिना निस्किने लक्षण देखिन्छ  ।

जिल्ला स्वास्थ्य कार्यालयका अनुसार प्यूठानमा गत वर्ष ४०२ बिरामीले क्षयरोगको औषधि खाने गरेका थिए । यस वर्ष १५७ जना बिरामी छन् ।
यसैविच स्वास्थ्य कार्यालयले जिल्लामा आएको कोभिड खोपको बुस्टर डोजबारे पनि जानकारी गराएको थियो । स्वास्थ्य कार्यालयका अनुसार तुरुन्तै लगाउन सकिनेगरि जिल्लामा ४१ हजार ७ सय ३० डोजखोप आएको छ । स्थानीय तहरुसंग समन्वय गरेर कोभिड बिरुद्धको बुस्टर डोज लगाउने तयारी भइरहेको स्वास्थ्य कार्यालय प्यूठानले जनाएको छ ।