२०८० जेठ १५तस्बिर हेर्दा सबैलाई लाग्छ यो कुनै भग्नावशेष भएको भवन हो । त्यहाँ बर्षौदेखि रेखदेख गर्ने मानिसको पहुँच छैन । त्यसैले लाखौ रुपैयाँ पर्ने सम्पत्ति बेहाल अवस्थामा छन् । तर, तस्बिरले झल्काउने कथा भन्दा यथार्थ बेग्लै छ । यो प्यूठान नगरपालिका–३, स्थित जिल्लाको सबैभन्दा जेठो विद्यालय मुक्ति माध्यामिक विद्यालय राटामाटाको कम्यूटर ल्याव हो ।
जुन विद्यालयमा प्राविधिक, साधारण र अन्य कर्मचारी गरि ४५ जनाभन्दा बढि कर्मचारी छन् । राज्यको लाखांंै रुपैयां खर्च गरेर निर्माण गरिएको कम्प्युटर ल्याव जोगाउनमा उनिहरुको नजर परेको देखिदैन । मुख्य त विद्यालय प्रशासनको चरम लापर्बाहिले गर्दा लाखौ रुपैयाँ खर्चेको सामाग्री काम नलाग्ने अवस्थमा पुगेका छन् ।
प्राविधिक धारका विद्यार्थीलाइ प्रयोगशाला बनाउन भनेर विभिन्न चरणमा गरि भण्डै ६८ लाख रुपैयाँ खर्च गरिएको विद्यालयको कागजातबाट खुल्छ । लाखौं रुपैया खर्चेर बनाएको ल्याव विद्यालय प्रशासनको लापर्बाहिले गर्र्दा बेहाल अवस्थमा पुगेको हो । ल्यावमा रहेका २४ वटा कम्प्युटर, स्मार्टबोर्ड लगायत सामाग्री बेवारिसे बनेका छन् ।
कम्प्युटर टेवलहरु धमिराले सत्यानास बनाएको छ । तारहरु मुसाले चुडालेर टुक्रा टुक्रा बनेका छन् । झण्डै एक वर्षदेखि ढोकै नखोलिएका कारणले ढुँसि लागेर कार्पेट थाङ्ग्रो बनेको छ । कोठा ठुसठुस्ति गनाउने भएको छ । विद्यालयमा प्राविधिक धारको कक्षा सञ्चालन गर्न भनेर २०७३ सालमा तत्कालीन जिल्ला शिक्षा कार्यालय मार्फत बजेट आएको थियो ।
त्यसपछि तत्कालीन प्रधानाक्यापक योगेन्द्रबहादुर जि.सी. संयोजक बनेको खरिद समितिले ल्याव निर्माण गरेको थियो । खरिद समितिका सदस्यहरु दधिराम सुबेदी र विष्णु पुन थिए । भर्खरै २०७९ चैत्र २४ गते अवकास भएका प्र.अ. योगेन्द्रबहादुर जिसीले आफै खरिद समितिको संयोजक बनेर निर्माण गरिएको ल्यावको अवस्थमा हेर्दा बेखबर जस्तै भएको छ ।
हिजोआज विद्यालयको प्रध्यानाध्यक दामोदर विष्ट छन् । आफूले प्र.अ.को जिम्मेवारी प्राप्तपछि कम्यूटर ल्यावको अवलोका गर्दा बेवारिसे अवस्थमा रहेको देख्दा दुःख लागेको बताए । हिजोआज प्राविधिक धारका विद्यार्थीलाई एनसेल कम्पनीले सहयोग गरेर निर्माण गरिएको कम्यूटर ल्यावमा प्राविधिक धारका विद्यार्थीलाई पठन–पाठन गराइदै आएको बताए ।
विद्यालय प्रशासनले उपलब्ध गराएको सूचना अनुसार कम्यूटर पठन–पाठन गराउने भनेर विद्यार्थी बाट समेत शुल्क लिइदै आएको छ । प्रति विद्यार्थी कक्षा ६ लाई ६०, कक्षा ७ लाई ७०, कक्षा ८ लाइ ८०, कक्षा ९ लाइ ९० र कक्षा १० लाई १०० रुपैयाँ मासिक शुल्क लिने गरिएको छ । तर विद्यार्थीलाई कम्यूटर कक्षामा लगेर सिकाउने गरिएको छैन ।
