२०८० जेठ २३यहाँका दामप्रसाद गौतमले गाउँमै उद्यम गरेर लाखौ कमाउँदै आएका छन् । प्युठान नगरपालिका ४, का ३८ बर्षिय गौतमले मसला उद्योगबाट मनग्य आम्दानी गरेका हुन् ।
करिव ९ वर्ष खाडि मुलुकमा बिताएका उनले स्वदेशमै काम गर्ने उद्धेश्यले झिमरुक घरेलु तथा मसला उद्योग संचालन गर्दै आएका छन् । बिदेशमा लामो समय बस्दा सोचे जस्तो कमाई नभएको देखेपछि गौतम गाउँ फर्केका हुन् ।
सुरुमा ३ लाख लगानी बाट सञ्चालन गरेको उद्योगमा अहिले करिब १० लाखको हाराहारीमा लगानी लगाएका छन् । अहिले उद्योगबाट उनले बार्षिक ४ लाख भन्दा बढि आम्दानी गर्दै आएका छन् ।
यहि उद्योगको कमाईबाट गौतमको ५ जनाको परिवार चलिरहेको छ ।
उद्योगका लागि आवश्यक पर्ने कच्चा पदार्थबाट बेसार, मसला, जीरा, धनिया, दालचिनी, सुक्मेल, लोवङ, ठुलोईलाची, मरिच, अदुवाको सुठो, टिमुर, स्टार्ट लागाएतबाट मसला उत्पादन हुदै आएको छ ।
जिल्लामा प्रयाप्त मात्रामा कच्चा पदार्थ नपाउँदा अँझै सोचेजस्तै गरी उद्योग फस्टाउन कठिनाई भएको गौतमले बताए । जिल्ला बाहिरबाट कच्चा पदार्थ खरिद गर्नुपर्दा ढुवानी सहित मसला समेत महंगो पर्न जाने उनको भनाइ छ ।
गाउँमै स्थापना गरिएको उद्योगलाई सरकारले अनुदान कार्यक्रमका निती ल्याएपनि आफूजस्ता उद्यमीले अनुदान नपाउँदा दुख लागेको बताए । सानो लगानीबाट सुरु गरेका उद्यमीलाई स्थानीय सरकारले समेत प्रोत्साहन नदिएको उनको भनाई छ ।
भान्सामा सबैभन्दा बढि मसला प्रयोग हुने गरेकोले जिल्लामै मसलामा आत्मनिर्भर बनाउनका लागि स्थानीय र प्रदेश सरकारले युवाहरुलाई प्रोत्साहनका लागि बिना धितो ऋण लगानी गरे धेरै युवा स्वरोजगार बन्ने गौतमले बताए ।
