सरूमारानी गाउँपालिकाले ज्येष्ठ नागरिक तथा अपांगता भएका व्यक्तिहरुलाई सम्मान सहित सामाग्री वितरण गरेको छ । गाउँपालिकाले आफ्नो पालिका क्षेत्रभित्र रहेका जेष्ठ नागरिक तथा अपांगता भएकाहरुलाई सामाग्री वितरण गरिएको सरुमारानी गाउँपालिका ४ का वडा अध्यक्ष तथा गाउँपालिका प्रवक्ता चिन्ता सोमै मगरले जानकारी दिए ।

सरुमारानी गाउँपालिका ४ मा आज आइतबार जेष्ठ नागरिक र अपागंताहरुलाई सामाग्री दिएको हो । वडामा भएका १२ जेष्ठ नागरीकलाई इलोक्ट्रोनिक किट्ली तथा थर्मस दिएको छ भने १० जना अपागंता भएकाहरुलाई अपागंता सहायता सामाग्री वितरण गरिएको वडा अध्यक्ष सोमैले जानकारी दिए । उनका अनुसार अरु वडाले वडा कार्यालयमा बोलाएर दिए पनि ४ नं वडाले घरघरमा पुगी सामाग्री दिएको छ ।

आर्थिक बर्ष २०७९/०८० को बार्षिक स्वीकृत कार्यक्रम अनुसार संघिय सरकारबाट प्राप्त बजेट ५ लाख मा ७१ जना जेष्ठ नागरीक र ५२ अपागंता गरि कुल एक सय २३ जनालाई सामाग्री वितरण गरिएको हो । यस अघिको आर्थिक बर्षमा पनि गाउँपालिकाले विभिन्न शिर्षकमा सामाग्रीहरु वितरण गरेको थियो । आर्थिक बर्ष २०८०/०८१ को लागि ३ लाख रुपैया बजेट रहेको बताईएको छ ।