नेपाल पत्रकार महासंघ जिल्ला शाखा प्यूठानले आफ्नो २३औं स्थापना दिवस मनाएको छ । शनिबार विहान जुम्री बजारबाट प्रभातफेरी जिल्ला अस्पताल बिजुवार पुगी रक्तदान कार्यक्रम गरि २३औं स्थापना दिवस मनाएको हो । रक्तदान कार्यक्रममा नेपाल पत्रकार महासंघ जिल्ला शाखा प्यूठानका अध्यक्ष सञ्जय रिजालले रगत दान गरेका छन् ।

संस्थापक उपाध्यक्ष मेघराज भट्टले आफ्नो पेशागत हकहितको लागि संस्थाको स्थापना गरिएको बताए । पत्रकार महासंघका श्रमजीवि पत्रकारहरुको विचार फरक भएपनि मिसन भने एउटै हुनुपर्ने उनको भनाई थियो । संस्थाका पूर्व अध्यक्ष गिरु प्रसाद भण्डारीले पछिल्लो समय पेशागत पत्रकारलाई ठूलो चुनौती भएको बताए । हरेक चुनौती सँग जुधेर श्रम गरिरहेका पत्रकारहरुलाई पत्रकार महासंघले जिल्ला देखि केन्द्र तहसम्म प्रोत्साहन गरिनुपर्ने आवश्यकता औल्याए ।

पत्रकार महासंघका केन्द्रिय सदस्य सुशील पोख्रेलले पत्रकारहरुलाई संख्यात्मक भन्दा पनि गुणात्मक पक्षलाई ध्यान दिएर अघि बढ्न आग्रह गरे । त्यस्तै जिल्ला शाखा प्यूठानका अध्यक्ष सञ्जय रिजालले पछिल्लो समय पत्रकारहरुले एकअर्कामा अस्वस्थ प्रतिस्पर्धा गर्दा सिंगो महासंघ सँगै पत्रकारहरुलाई असर पुगेको बताए ।