नागरिक अभियान प्यूठानको आयोजनामा केहुदैछ ? के भैइरहेको छ, चासो गुनासो र प्रस्न सहितको विशेष कार्यक्रम मंगलबार प्यूठान नगरपालिकाका जनप्रतिनिधिहरुसंग नागरिक अभियान प्यूठानले नगरपालिकाको काम कारबाहीबारे चासो, गुनासो र प्रश्न सहितको सम्बाद कार्यक्रम गरेको छ । प्युठान नगरपालिकाका नगरप्रमुख, उपप्रमुख र प्रमुख प्रशासकीय अधिकृतलाई राखेर विभिन्न विषयबस्तुमा प्रश्न गरेको थियो ।

अभियानले पालिकाले बिगतमा कार्यान्वयन गरिएको आयोजनाका कामहरुको तस्बिरहरु सहित अवस्था उल्लेख गर्दै जनप्रतिनिधिसंग जवाफ मागेको थियो । पालिका भित्रको स्वास्थय, शिक्षा, रोजगार तथा फोहोर ब्यवस्थापन, जग्गा वर्गीकरण, खेल मैदान ब्यबस्थापन लगायत अन्य विषय बस्तुमा समेत सहभागीले प्रश्न, जिज्ञासा राख्दै नगर पालिकाको जनप्रतिनिधिलाई सुझाब समेत दिएका छन् ।

कार्यक्रममा नगर प्रमुख विष्णु बहादुर योगीले कार्यक्रमले पालिकाको काम कारबाहीलाई चुस्त बनाउन महत्वपूर्ण सुझाब मिलेको बताए । नगरप्रमुख योगीले पालिकाले संचालन गर्ने योजनाको आफ्नो समुदायमा भएको कामको प्रत्यक्ष रुपमा अनुगमन गर्न समेत आग्रह गरेका छन् ।

नगर उपप्रमुख देबेन्द्र वर्माले कतिपय प्रदेश र संघीय सरकारले गर्ने काममा पालिकालाई जानकारी नदिने गरेको भन्दै आगामी दिनमा त्यस्ता योजनाको विषयमा समेत पालिकाले चासो दिने तर्क गरे । प्रमुख प्रशासकीय अधिकृत नारायण प्रसाद भण्डारीले पालिकाको योजना कार्यान्वयन गर्न आफुले पहल गर्ने बताए ।

अभियानका संयोजक सुमन सुबेदीले पालिकाको कामलाई वाह भन्न पाउने गरि काम होस भन्ने उदेश्यले कार्यक्रम आयोजना गरिएको बताए ।