पोल, तार पुर्‍याएको लामो समय सम्म पनि बिजुली बाल्न ढिलाई गरेको भन्दै स्थानीय शुक्रबार नेपाल विद्युत प्राधिकरण प्यूठान वितरण केन्द्रमा डेलिकेशन आएका छन् । प्यूठानको दुर्गम मानिने नौबहिनी ७ पातचौर क्षेत्रका स्थानीय वडाका निर्वाचित जनप्रतिनिधि लिएर बिजुली बत्ती चाडो जडान गर्न भन्दै नेपाल विद्युत प्राधिकरण प्यूठान वितरण केन्द्रको कार्यालय नयाँबजार जुम्रीमा डेलिकेशन आएका हुन् ।

कार्यालयमा धेरै पटक अनुरोध गर्दा पनि विद्युत बाल्नका लागि तत्परता नदेखाएपछि स्थानीय आक्रोशित भएर डेलिकेशन आएको वडाध्यक्ष रोमबहादुर बुढाथोकीले बताए । उनका अनुसार विद्युत बाल्न भन्दै २०७० साल देखि विद्युतको काम सुरु भएको थियो । अझै बिजुली बत्ती बलेको छैन् । वडाको पातचौर, पोखरा, स्याउले, खाल, न्यानलखोला, थात्रा लगायत बस्तिका झन्डै २ सय घरधुरी बिजुली बाल्नबाट बन्चित भएका छन् ।

यस क्षेत्रका सबै बस्तिमा बिजुली बाल्न ठेक्का गरिएका काम अधुरा भएकाले बत्ती बाल्न समस्या भएको नेपाल विद्युत प्राधिकरण प्यूठान वितरण केन्द्रका प्रमुख महेन्द्र कुमार दासले बताए । डेलिकेशन आएका स्थानीयलाई केहि दिनमा नै बिजुली बत्ती बाल्ने प्रतिबद्धता गरेर कार्यालयले पठाएको छ । पोल, तार भइसकेकाले ट्रान्समिटर लगेर एक, दुई दिनमै त्यस क्षेत्रमा आफै जाने योजना बनाएको दासले बताए । ‘ट्रान्समिटर लिएर भोली नै पातचौरको पोखरा जाने योजना बनाएका छौ,’उनले भने, ‘एकहप्ता भित्र बिजुली बाल्ने गरी भोलीबाटै काम सुरु गर्दैछौ ।’