स्वास्थ्य कार्यालय प्यूठानले फाईजर-बायोएनटेक खोप दिने सम्बन्धी सञ्चारकर्मीहरु सँग अन्तरक्रिया कार्यक्रम गरेको छ । सोमबार स्वास्थ्य कार्यालयको सभाहलमा कार्यालयका निमित्त कार्यालय प्रमुख मधुसुदन खड्काको अध्यक्षतामा अन्तरक्रिया कार्यक्रम भएको हो ।

कार्यक्रममा १२ बर्ष माथीकाका लागि फाईजर–बायोएनटेक खोपको परिचय, खोप भण्डारण तथा जीवन अवधि, जनशक्ति परिचालन, खोप दिने आधार, अभियान सञ्चालन अवधि र चरण, खोप लगाउन नहुने अवस्था, खोप केन्द्र निर्धारण लगायतको बारेमा जानकारी गराईएको थियो ।

जर्मनद्धारा नेपाललाई प्राप्त भएको फाईजर–बायोएनटेक खोप जिल्लामा ४१ हजार आएको स्वास्थ्य कार्यालय प्यूठानका कोल्ड चेन निरिक्षक कोशल राज वैद्यले जानकारी गराएका छन् । उनका अनुसार खोप सोमबार ९ वटै स्थानीय तहमा पुर्‍याईएको र मंगलबार भोलि साँझ सम्म सबै स्वास्थ्य संस्थामा पुग्ने छन् । यहि माघ २४ गतेदेखि २८ गतेसम्म देशैभर एकसाथ खोप लगाउन लागिएको पनि बताईएको छ ।

नागरिकहरुले आ–आफ्नो नजिकैको खोप केन्द्रमा गएर खोप लगाउनु हुन समेत स्वास्थ्य कार्यालयले अनुरोध गरेको छ । खोप केन्द्र रहने स्थानको जानकारी स्थानीय स्वास्थ्य संस्थाबाट प्राप्त गर्न सकिने बताउँदै खोप लगाउन जाँदा यसअघि खोप लगाएको खोप कार्ड अनिवार्य लिएर जान समेत कार्यालयले सबैलाई अनुरोध गरेको छ ।