झिमरुक गाउँपालिकाले १ सय ६८ जना कृषकहरुलाई स्थलगत बाख्रा पालन तालिम दिईएको छ । गाउँपालिकाको आर्थिक बर्ष २०८०÷०८१ को बार्षिक स्वीकृत कार्यक्रम अनुसार गाउँपालिकाको वडा नं ५, ६ र ८ गरी ३ स्थानमा १ सय ६८ कृषकहरुको लागि स्थलगत तालिम दिईएको झिमरुक गाउँपालिका पशु स्वास्थ्य प्रमुख कृष्ण बस्नेतले जानकारी दिए । उनका अनुसार स्थानीय स्तरका कृषकहरुको आम्दानी बृद्धि गर्ने र बाख्रा पालन व्यवसायमा अग्रसर बनाउनको लागि तालिम सञ्चालन गरिएको हो ।

झिमरुक गाउँपालिकाको आयोजनामा चैत २१ गते ८ नं वडा, २३ गते ५ नं वडा र २५ गते आइतबार ६ नं वडा धगेमा तालिम गरिएको गाउँपालिकाले जनाएको छ ।

तालिममा सहभागिहरुलाई बाख्राको लागि खोर निर्माण, बाख्रालाई गरिने औषधी उपचार, सरसफाई, बाख्रा पालन कसरी गर्ने लगायतको बारेमा जानकारी दिईएको वडा न. ६ का वडाध्यक्ष धन बहादुर पुनले जानकारी दिए । उनका अनुसार त्यस तालिमबाट बाख्रा पालनमा कृषकहरुलाई सहज हुने छ ।