नेपाल औषधी व्यवसायि संघ प्यूठान शाखाले मुक्ति माध्यमिक विद्यालय रातामाटामा प्राथमिक उपचारको लागि सामग्री तथा औषधी हस्तान्तरण गरेको छ । नेपाल औषधि ब्यबसायि संघको ५१औं स्थापना दिवसको अवसरमा सोमबार एक कार्यक्रमको आयोजना गरी सामग्री हस्तान्तरण गरेको हो । जिल्लाको सबैभन्दा पुरानो तथा धेरै विद्यार्थी भएको विद्यालय भन्दै उक्त सामग्री हस्तान्तरण गरिएको संघका महासचिव खिम प्रसाद पार्धेले जानकारी दिए । उनका अनुसार करिब ५ हजार बराबरको सामान र औषधी प्रदान गरिएको छ ।

विद्यालयमा हुने सामान्य विरामीहरुको समास्यालाई तत्काल समाधान गर्नको लागि सहयोग पुग्ने भन्दै प्राथमिक उपचारका लागि स्वास्थ्य सामग्री दिईएको हो । सामान्य चोटपटक लाग्दा, बान्ता आउँदा, पखाला लाग्दा अन्य केहि स्वास्थ्य समस्या आउँदा सामान्य उपचारको लागि १४ प्रकारका औषधी विद्यालयका सहायक प्रधानाध्यापक दिनेशचन्द्र सुवेदी मार्फत हस्तान्तरण गरिएको छ । नेपाल औषधी व्यवसायि संघ प्यूठानका अध्यक्ष भगत बहादुर कर्माचार्यको अध्यक्षतामा कार्यक्रम भएको थियो ।