नमस्ते यातायात सेवा प्रा.लि प्यूठानका कार्यालय प्रमुख दिल बहादुर दसौदीले यात्रुहरुसँग नम्र व्यवहारका साथ नयाँ एसी सस्पेन्सर रात्री सेवा बस सञ्चालनमा लिएको बताएका छन् । विहीबार प्यूठान नगरपालिका ८ बाग्दुलामा रहेको आफ्नै कार्यालयमा पत्रकार सम्मेलन गरी बस सेवा सञ्चालनको बारेमा यस्तो जानकारी दिएका हुन् । यात्रुहरुलाई स्वस्थ खानाको व्यवस्था, शिष्टाचार व्यवहार लगायतका विषयमा चालक सहचालक सँग सुझाव लिएको बताए ।

प्रा.लिका अध्यक्ष लिलापसिंह के.सीले संस्थामा सबै यूवैयूवाको सञ्जाल रहेको बताउँदै यो अवस्थासम्म आउँदा धेरै सफलता हासिल गरेको बताए । नेपाल सरकारद्धारा निर्धारण गरिएको भाडादर भन्दा एक रुपैयाँ पनि कुनै यात्रुबाट बढि नलिने समेत दाबी गरेका छन् । विभिन्न समस्याको बाबजुत प्यूठानी जनतालाई आरामदायि यात्रा गर्नको लागि सुविधा सम्पन्न बस जिल्लामा पहिलोपटक भित्र्याएको बताए । साथै जिल्लामा खोलिएको यो संस्था एउटा व्यक्तिको मात्र नभई साझा प्यूठानी जनताको भएको उल्लेख गरेका छन् ।

प्रा.लि स्थापना गरेको आठौ बसन्त पार गरेको अवसरमा नयाँ र फरक काममा जोडिएको प्रा.लिका महासचिव मुकेश थापाले बताए । नमस्ते प्यूठान यातायात सेवा प्रा.लि नयाँ भएपनि यसले केही गर्न खोजेको संस्था भएको उनको भनाई थियो । साथै अहिलेसम्म नमस्ते यातायात सेवा प्रा.लिबाट कुनै पनि अपृय ठूला घटना व्यहोर्न नपरेको समेत दाबी गरे ।

प्रा.लि द्धारा हाल जिल्लामा भित्रिएका ३ वटा रात्री एसी सस्पेन्सर बसमा ३७ सिट सहित २ वटा सिल्भर सिट रहेको प्रा.लिले जनाएको छ । प्रा.लि का अनुसार बस भित्र सिसिटिभी क्यामेरा, आरामदायि सिट, सेनिटरी प्याड, शुद्ध खानेपानी, फ्री वाईफाई, सुझाब पेटिका लगायतका व्यवस्था रहेको जनाएको छ । यस्तै प्रा.लिले प्यूठान सदरमुकाम खलंगाबाट सेवा दिन लागेको छ ।