हिन्दु नेपाली धर्मावलम्बी महिलाहरुले आज दर खादै छन् । हरितालिका तीजको ब्रत स्वरुप आज दर खान लागेका हुन् । दरका लागि माइतीले आफ्ना चेलीलाई बोलाउने वा लिन जाने चलन समेत रहेको छ । विशेषगरी दिदीबहिनी जम्मा भई रातिसम्म नाचगान गरी रमाइलो गर्ने र मिठो खानेकुरा खाने गर्दछन् । तर, पछिलो समय एक महिना अघि देखि नै दर खाने चलन चल्दै आएको छ । यसले गर्दा तीजको व्रत स्वरुप सोही दिन खाने दरको औचित्य नै नरहने जस्तो देखिन्छ । तीजको अघिल्लो दिन दिदीबहिनी भेटभई एक दिन दर खाने र त्यसको भोलिपल्ट ब्रत बस्ने चलन छ । त्यस दिन ब्रत बसेकाहरुले पानी समेत खाँदैनन् ।

७० बर्ष अघि तीजको समयमा दिदीबहिनी जम्मा भएर घ्यू राखेको भात,(खाजा) खिर, गाउँमै उत्पादन भएका तरकारी लगायत मिलाएर दर खाने गरेको अनुभाव प्यूठान नगरपालिका ४ टारीकी ८२ बर्षिया खिमा सुवेदीले सुनाइन् ।

स्वास्थ्यको लागि फाइदा हुने स्वस्थ खानेकुरा खान चिकित्सिकहरुले सुझाउने गरेका छन् । दैनिक रुपमा स्वास्थ्यलाई असर पार्ने खानेकुरा खान नहुने प्यूठान अस्पतालका मेडिकल सुपरिटेन्डेन्ट राजेन्द्र पौडेलले बताए । चिल्लो पदार्थ बढि प्रयोग नगर्न र मासुको मात्रा कम गर्न पौडेलको सुझाब छ । “सुगरको बिरामीहरु सकेसम्म ब्रत नबस्दा नै राम्रो हुन्छ,’ पौडेलले भने,‘किन की स्वास्थ्यको लागि खाली ब्रत सकारात्मक पक्ष होइन् ।” सुगरको कमी भएकाहरुलाई समस्या हुने भन्दै खाली पेट नबस्न पनि उनले भनेका छन् । दिनभरी पानी समेत नखाई ब्रत बस्दा मृगौलालाई समस्या हुने भएकाले ब्रतको समयमा पानी पिउन आवश्यक रहेको पौडेल बताउँछन् ।