प्युठानमा पछिल्लो तीन वर्षमा आत्महत्या गर्नेको सङ्ख्या बढ्दै गएको छ । आर्थिक वर्ष २०७८/०७९ देखि २०८०/८१ को अवधिमा २ सय २१ जनाले आत्महत्या गरेको जिल्ला प्रहरी कार्यालयको तथ्याङ्क छ ।

आर्थिक वर्ष २०७८/०७९ मा ६८ जना, २०७९/०८० मा ७४ र २०८०/८१ मा ७९ जनाले आत्महत्या गरेका छन् । आत्महत्या गर्नेमा धेरै युवा उमेरका भए पनि बालबालिकाको सङ्ख्या बढ्दो दरमा रहेको जिल्ला प्रहरी कार्यालय प्युठानका प्रमुख प्रहरी नायव उपरीक्षक ईश्वर थापाले बताए ।

तीन वर्षको अवधिमा ९१ जना १८–४० उमेर समूहका युवायुवतीले आत्महत्या गरेका छन् । ६६ जना ४१–६० वर्ष उमेर समूहका प्रौढले आत्महत्या गरेका छन् भने ४६ जना १८ वर्ष भन्दा कम उमेरका बालबालिकाले आत्महत्या गरेका छन् । ६१ वर्षभन्दा माथिका १८ जनाले आत्महत्या गरेको प्रहरीको तथ्याङ्क छ ।

परिवारको असहयोग, सामाजिक विकृति, आर्थिक अभाव, कम क्षमता वा केही गर्न सकिन्न भन्ने धारणा विकास हुँदा आत्महत्याको सोच आउने गरेको मनोपरामर्शदाता शान्ति पण्डितले बताइन । उनका अनुसार आफ्नो जीवनमा आएका समस्याको समाधान नदेख्दा र एक्लोपनको महसुस गर्दा नकारात्मक सोच आउने गर्दछ । यस्ता सङ्केत आउने बित्तिकै परिवार र समुदायले पनि समयमै ध्यान दिनुपर्ने उनले बताइन ।

प्रहरीका अनुसार बेरोजगारी, पारिवारिक समस्या, दीर्घ रोग, एक्लोपन र स्वयं वा परिवारका सदस्यले अत्यधिक मादक पदार्थ सेवन जस्ता कारण आत्महत्या हुने गरेको छ ।

अभिभावकले मादक पदार्थ सेवन गर्दा बालबालिकाद्वारा आत्महत्या

आत्महत्या गर्ने १८ वर्ष मुनिका बालबालिकामध्ये अधिकांशका अभिभावकले मादक पदार्थ सेवन गर्ने गरेको पाइएको छ ।

जिल्ला प्रहरी कार्यालय, प्युठानले आ.व. २०८०/८१ मा आत्महत्या गरेका २२ बालबालिकाको परिवारमा गरेको अध्ययनले त्यस्तो देखाएको छ । प्रहरीले अध्ययन गरेका २२ परिवारमध्ये २० जनाको परिवारमा मादक पदार्थ सेवन गर्ने र २ परिवारमा नगर्ने पाइएको थियो । त्यसै गरी ती मध्ये १२ जनाको परिवारका सदस्य वैदेशिक रोजगारीमा गएको पाइएको डिएसपी ईश्वर थापाको भनाइ छ ।

प्रहरीले अध्ययन गरेका आत्महत्या गर्ने २२ जना बालबालिकामध्ये सबैभन्दा बढी १० देखि १५ वर्षको उमेर समूहका १० जना रहेका छन् । १६ देखि १८ का ९ जना र १० वर्ष मुनीका ३ जना रहेको थापाले जानकारी दिए ।