प्रथम भित्रिकोट प्यूठान महोत्सवमा आयोजकले स्थानीय कृषकलाई निःशुल्क उत्पादन विक्रीको प्रबन्ध मिलाएपछि स्थानीय उत्पादक खुसी भएका छन् । अर्ग्यानिक उत्पादनमा दर्शक पनि आकर्षित भएका छन् । १३ दिनसम्म चल्ने महोत्सवमा स्टल नं. ९ स्थानीय उत्पादन रुचाउनेका लागि आकर्षक स्टल बनेको छ ।

गौमुखी गाउँपालिका ३ रजवाराका नरेन्द्र मल्ले सञ्चालन गरेको सुमन जडीबुटी, फलफूल तथा कृषि नर्सरी फर्मले उक्त स्टलमा किवीको फल बिक्रीका लागि राखेको छ । किवी फल र सुकाइएको किवीका साथै खुङ्गमा उत्पादन भएको कोदोको पिठो, कागतीको रस, बेलौती, सुन्तला लगायतका फलफूल र अन्न स्टलमा राखिएको स्टलमा रहेकी प्रदर्शक सुन्दरी चन्दले बताइन् ।

ग्रेडिङ गरिएको किवी २ सय देखी ३ सय रुपैयाँ प्रतिकेजी, कोदोको पिठो १ सय रुपैयाँ प्रतिकेजी, कागतीको रस १ सय ८० मिलिको १ सय ५० रुपैयाँ, सुन्तला र बेलौती ८० रुपैयाँ प्रतिकेजीका दरले बिक्री भइरहेको उनले बताइन् । बिक्री गर्नका लागि मल्लले ४ क्विन्टल किवी ग्रेडिङ र प्याकेजिङ्ग गरेर महोत्सवमा ल्याएका छन् । मल्लले रजवारामा १२ रोपनी जमिनमा किवी खेती गरेका छन् । ६ वर्षअघि काठमाण्डौबाट २५ वटा बिरुवा ल्याएर किवी खेती सुरु गरेका मल्लले यो वर्ष २५ क्विन्टल किवी उत्पादन गरेको बताए । ‘हालसम्म ५ क्विन्टल बिक्री भइसकेको छ ।’ मल्लले भने–‘२५ क्विन्टल बेच्न सकियो भने ६ लाख आम्दानी हुन्छ ।’ किवीका साथै उनले टिमुर, अलैँची, बेसार, दाँते ओखर, स्याउ, केसर लगायतको खेती गरेका छन् ।

महोत्सवको स्टलमा किवीसँगै अन्य स्थानीय उत्पादनहरू किन्न चाहने ग्राहकलाई सहज होस् भनेर सामाग्रीहरू राखिएको गाउँपालिकाले जनाएको छ । पालिकाको सहजिकरणमा स्थानीय उत्पादनको बजारीकरणका लागि महोत्सवमा गौमुखीको उत्पादन पुर्‍याइएको पालिकाले जनाएको छ ।