जिल्ला अस्पताल बिजुवार प्यूठानलाई आज ब्यक्तिगत सुरक्षा सामग्री (पिपिई) हस्तान्तरण गरिएको छ।
प्रभू लाइफ इन्स्योरेन्स र शाइन रेसुंगा बैंक डेभलपमेन्ट बैंक लिमिटेडको सहयोगमा आएको ५० सेट पिपिई प्यूठान नगरपालिकाका मेयर अर्जून कुमार कक्षपतिले जिल्ला अस्पताल प्यूठानमा कार्यरत एमडिजिपि डा. सुनिल सुनारलाई हस्तान्तरण गरेका हुन्। स्वास्थ्यकर्मीहरुलाई कोरोना संक्रमणको जोखिम अत्यधिक भएको भन्दै उनले भने–“धेरै ठाउँहरुमा पिपिई अभावका कारण डाक्टरहरुले सामान्य बिरामीहरु पनि नहेर्ने स्थिति छ यहाँ त्यसो नहोस् भनेर पिपिई प्रदान गरेका हौं।”मेयर कक्षपतिले सहयोग गर्ने सहयोगी निकायलाई धन्यबाद समेत दिए।
कार्यक्रममा पिपिई ग्रहण गर्दै जिल्ला अस्पताल प्यूठानका एम.डि.जि.पि डाक्टर सुनिल सुनारले अस्पतालमा आउने बिरामीहरुलाई आफु सुरक्षित भएपछि अरुलाई पनि सेवा प्रदान गर्न सहज हुने बताए। जिल्ला अस्पतालमा पिपिई एकदमै कम थियो उनले भने–“ यो पिपिई सेटले उपचार गर्दा हामीलाई सुरक्षा प्रदान गर्नुका साथै निकै सहयोगी हुनेछ।”
कोरोना भाईरस संक्रमणका बिरामी आउन सक्ने अबस्थालाई ध्यान दिदै अस्पतालले ज्वरो आएका बिरामीहरुलाई छुट्टै चेकजाँच गर्नका लागि फिभर क्लिनिक स्थापना गरेको छ। त्यहाँ सामान्य चेकजाँच गरिसकेपछि मात्र अस्पतालमा आउने बिरामीहरुलाई अन्य उपचार सेवा प्रदान गर्ने गरिएको उनले जानकारी दिए।