प्युठान नगरपालिका वडा नं ३ पुष्पलाल चोक जुम्रीमा महेश स्मृति प्रतिक्षालय निर्माण गरिएको छ । प्युठान नगरपालिका वडा नं ३ जुम्रीका स्वर्गीय विद्यार्थी नेता महेश वि.क.को स्मृतिमा प्रतिक्षालय निर्माण गरिएको हो । यस क्षेत्रका स्थानीय तथा अनेरास्ववियू प्युठानको पहलमा आर्थिक संकलन गरी प्रतिक्षालय निर्माण गरिएको जनाईएको छ ।
नवनिर्मित प्रतिक्षालयको आज उद्घाटन गरिएको छ । समाजसेवी डाक्टर लेखराज सुवेदीले प्रतिक्षालयको उद्घाटन गरेका हुन् । उद्घाटन कार्यक्रममा सुवेदीले स्वर्गीय महेशको सम्झनामा यूवाहरुले आर्थिक श्रम र बौद्धिक क्षमता सम्झेर उनको योगदानलाई सम्झना स्वरुप प्रतिक्षालय निर्माण गरेकोमा खुसी व्यक्त गरे । यस क्षेत्रका होनाहार यूवालाई गुमाउनु परेको स्मृति गर्दै सुवेदीले यस्ता रचनात्मक कामले उनलाई सदैव सम्झिरहने बताए । प्रतिक्षालय निर्माणले यस क्षेत्रको फाईदासंगै यस क्षेत्रमा आवतजावत गर्ने नयाँ यात्रीहरुले पनि स्वर्गीय महेशको बारेमा जानकारी लिन सक्ने उनले बताए ।
स्वर्गीय महेशको सम्झनामा निर्माण गरिएको प्रतिक्षालयले प्युठान नगरपालिका भित्रका जनताहरुसंगै यस क्षेत्रमा आवत जावत गर्ने जुनसुकै स्थानका यात्रुलाई फाईदा पुग्ने महेश स्मृति प्रतिक्षालय निर्माण संरक्षक सुमन श्रेष्ठले बताए । यस क्षेत्रका यूवाहरुको सकृयतामा निर्माण भएको प्रतिक्षालयले स्वर्गीय महेशको मानमर्दनमा थप सहयोग पुग्ने समेत उनले बताए । स्थानीय र अनेरास्ववियूको पहलमा ८४ हजार ५ सय ५० रुपियाँ लागतमा प्रतिक्षालय निर्माण गरिएको हो ।
महेश स्मृति प्रतिक्षालयले अनेरास्ववियू प्युठानको पहिचान बोकेको अनेरास्ववियू प्युठानका सहसंयोजक पुस्कर शर्माले बताए । स्वर्गीय महेशको स्मृतिमा यसपूर्व पनि जिल्लामा विविध कार्यक्रम सञ्चालन भएको र आगामी दिनमा पनि यस्ता रचनात्मक कार्य, कार्यक्रमहरु सञ्चालन गरिने उनले बताए ।