सरकारले भिभिआइपीको सवारीका लागि भन्दै हेलिकोप्टर किन्ने निर्णय गरेको थियो। तर, सरकारले निकै आलोचना खेप्नु परेको थियो। भिभिआइपी सवारीका निम्ति त्यो हेलिकोप्टर प्रयोग गर्ने र प्रयोगमा नआँउदा दुर्गम क्षेत्रका गर्भवति र सुत्केरी अवस्थामा रहेका महिलाको स्वास्थ्यमा समस्या देखिए उद्धार गर्न प्रयोग गर्ने गरी खरिद गर्यो।

अहिले त्यही हेलिकोप्टर दुर्गम क्षेत्रका महिलालाई भगवान सरह भएको छ। दुर्गम क्षेत्रमा ज्यान जोखिममा परेका गर्भवती तथा सुत्केरी महिलाको उद्धार गर्न ६ पुस २०७५ मा ‘राष्ट्रपति महिला उत्थानु कार्यक्रम’ सुरु भएको हो। यो कार्यक्रम शुरु भएदेखि २०७७ पुस अन्तिमसम्म १७० जना सुत्केरीको हवाइ उद्धार गरिएको छ। धेरै आमा र शिशुले पुनःजीवन पाएका छन्। यो काम कति महत्वपूर्ण छ भन्ने सोलुखुम्बुको सोताङकी पुष्षकला राईलाई राम्रोसँग थाहा छ। “चार–पाँच दिन पेटमा सारो हुँदा डर लाग्यो। पानी बगेको थियो, दिसैदिसा बगेको थियो “, पुष्पकला भन्नुहुन्छ।

त्यसपछि हेलिकप्टरबाट काठमाडौं ल्याइयो। प्रसूति गृहका दक्ष चिकित्सकको सहयोगमा उहाले बच्चा जन्माउनु भयो। पुष्पकलाका श्रीमान परशुराम राई भन्नुहुन्छ, ‘‘त्यतिवेला लकडाउन थियो। राष्ट्रपति महिला उत्थान कार्यक्रम अन्तर्गत यस्तो सेवा रहेछ। उहाँहरूले त्यसको व्यवस्था मिलाइदिनुभयो।” पुष्पकला छोरा बोकेर घर फर्किसक्नु भएको छ।

जटिल अवस्थामा सुत्केरी हुने क्रममा आमा, शिशु वा दुवैको पनि ज्यान जाने गरेको छ। तीन दशक अघि धेरै सुत्केरीको ज्यान जाने गर्थ्यो। सन् १९९१ मा नेपालमा एक लाख सुत्केरी हुँदा ८५० जना आमाको ज्यान जाने गरेको थियो। त्यसको २५ वर्षपछि सन् २०१६ मा सुत्केरीको मृत्यु हुने क्रम घट्यो। तैपनि अहिले एक लाख सुत्केरी हुँदा २३९ जना सुत्केरीले ज्यान गुमाउने गरेका छन्। सरकारले त्यसलाई सकेसम्म कममा झार्ने प्रयास गरिरहेको छ।