फोहोर फाल्ने जग्गा विवादका कारण प्यूठान नगरपालिकाले साउन १ गतेदेखि फोहोर संकलन गर्न छाडेको छ । नगरपालिकाले फोहोर फाल्नका लागि भाडामा लिएको जग्गाको म्याद असार मसान्तमा सकिएपछि फोहोर उठाउन छाडेको हो । जग्गा धनीले फोहोर फाल्नको लागि जग्गाको म्याद थप्न मानेका छैनन् ।

नगरपालिकाले आफ्नो प्रशासकीय भवन भन्दा तल झिमरुक फाँटमा फोहोर फालेर व्यवस्थापन गर्दै आइरहेको थियो । यो ठाउँमा नगरपालिकाले फोहोरको वर्गीकरण गरेर मल बनाउने भन्दै लाखौँ खर्चेर भौतिक संरचना समेत निर्माण गरेको छ । साविकको जिल्ला विकास समिति मार्फत प्यूठान नगरपालिका ४ स्थित कार्कीडाँडा क्षेत्रमा करडौ खर्चेर निर्माण गरिएको डम्पीङसाइडमा स्थानीयले फोहोर फाल्न नदिएपछि नगरपालिकाले यहाँ वैकल्पिक व्यवस्था गरेको थियो ।

फोहोर उठान रोकीपछि बिजुवार, बाग्दुला, जुम्री क्षेत्रका बजारबासीले गुनासो गर्न थालेका छन । फोहोर फाल्ने क्षेत्रको व्यवस्थापन गरेर फोहोर उठाउने कार्यलाई निरन्तरता दिनेगरि नगरपालिकाले तयारी गरिरहेको प्रमुख प्रशासकीय अधिकृत महेशकुमार गुरुङले बताए ।