२०७९ साउन २३, प्यूठानप्यूठानको ऐतीहासिक तथा धार्मिक तिर्थस्थल स्वर्गद्वारीमा आज बिहानैदेखि बर माग्नेहरुको घुँइचो लागेको छ । स्वर्गद्वारी महाप्रभु बालतपस्विको आज जन्मदिन परेकाले बर माग्ने भक्तजनहरुको घुँइचो लागेको हो ।
श्रावण पुत्रदा एकादशिका दिन वि.सं १९१६ सालमा रोल्पा जिल्लाको रुम्टी गाउँमा १०८ स्वर्गद्वारी महाप्रभु बालतपस्वि नारायण गौतमको जन्म भएको थियो । महाप्रभुको आज १ सय ६३ औं जन्मजयन्त्री भव्य रुपमा मनाइदैछ ।
महाप्रभु वि.सं १९५१ मा स्वर्गद्वारी आएपछि बेदका मन्त्रद्वारा अग्नी प्रज्वलीत गरी १९५२ बैशाख पुर्णिमा देखी उनले अखण्ड महायज्ञ सुरु गरेका किंबदन्ती छ ।
त्यसबेलादेखी बिस्व शान्तिका लागि संचालीत अखण्ड यज्ञको अग्नि हालसम्म पनि निरन्तर रुपमा बलीरहेको छ । महाप्रभुको जन्मदिनको अवसरमा आज बिहानैदेखी भोली बिहान सम्मका लागि चौबिस घण्टा अखण्ड किर्तन संचालन भैरहेको स्वर्गद्वारी आश्रम प्यूठानले जनाएको छ ।
पशुपति नाथको मन्दिरमा शिबजीको मात्र पुजा पाठ गरीन्छ भने स्वर्गद्वारीमा हिन्दुहरुका सम्पुर्ण पुजा, अग्नीको हवन गर्ने बिधिबाट यहाँ विस्वमा हिन्दुहरुको संस्कार अनुसार चलेको तिर्थाटन स्वर्गद्वारीमा मात्र गरीदै आएको छ ।
स्वर्गद्वारी नगरपालिकामा अवस्थित स्वर्गद्वारी आश्रम समुद्रि सतहदेखी करिव ७ हजार फिट उचाइमा पर्दछ । यहाँ आई पुजापाठ गरी मन्दिर अवलोकन गर्नाले मनले चिताएको पुग्ने र स्वर्गमा पुग्न सकिने धार्मिक विस्वास रहँदै आएको छ ।
जिल्लाकै अग्लो स्थान भएकाले यहाँ आनन्दको शिरसिरे बतास चलीरहने र यहाँबाट उच्च हिमश्रृंखला देखीने भएकाले स्वर्गद्वारी जिल्लाकै मुख्य रमणीय पर्यटकिय तिर्थस्थलको रुपमा चिनिदै आएको छ ।
नेपालका विभिन्न स्थानसगँै भारतका धेरै ठाउँहरुबाट यहाँ दैनिक सयौ, हजारौको संख्यामा पर्यटक तथा भक्तजनको भिड लाग्ने गरेको छ ।
पहाडको टाकुराबाट सेतै फुलेका उच्च हिमश्रृंखला देख्न सकिन्छ भने तलतीर समथर ठाउँमा कुहिरोले छपक्कै ढाकेको आनन्द पनि यहाँबाट देख्न सकिन्छ ।
