करदाता सेवा कार्यालय चकचके प्यूठानले प्यूठान र रोल्पाका २ जना ब्यवसायीहरुलाइ सम्मान गरेको छ । दशौ कर सप्ताह दिवसका अवसरमा प्यूठानका निरज जनरल स्टोरका निरज कक्षपति र रोल्पाका शुभम ट्रेडर्सका सागर बिक्रम डाँगीलाइ सम्मान गरिएको हो ।

प्यूठान र रोल्पा कार्यक्षेत्र रहेको करदाता सेवा कार्यालयले उनीहरुलाइ मूल्य अभिवृद्धि कर, आयकर लगायतमा सबैभन्दा धेरै योगदान गर्ने व्यक्ति तथा संस्थाका रुपमा सम्मान गरीएको कर अधिकृत हुर्मत मिजारले जानकारी दिए । उनिहरुलाइ सम्मान पत्र द्वारा सम्मान गरीएको हो । यसैबिच करदाता कार्यालयमा कार्यरत डा.इ.सु. सुमन चौधरी पनि सोही अवसरमा सम्मानित भएका छन् ।

उनलाइ कार्यालयमा कर्मचारीका रुपमा रही उल्लेखनिय एवं प्रशंसनिय कार्य सम्पादन गरेको कार्यको उच्च मुल्याङ्कन गर्दै नगद पुरस्कार सहित सम्मान पत्र द्वारा प्रशंसा पत्र प्रदान गरीएको हो ।

बुधवारदेखि सुरु भएको कर सप्ताहको समुद्घाटन कार्यक्रम स्वर्गद्वारी नगरपालिका भिंगृमा आयोजना गरीएको थियो । कार्यालयले कर सप्ताहको रुपमा कर समबन्धि विविध कार्य गर्ने तयारी भइरहेको कर अधिकृत मिजारले झुलेनी पोष्टलाइ बताए ।

यो वर्ष ‘स्वेच्छिक कर सहभागितामा अभिबृद्धि : सुशासन विकास र समृद्धी” नारा दिएर दशौ कर दिवस सप्ताहव्यापी मनाउन लागिएको हो । नेपालमा २०५४ साल मंसिर १ गतेबाट मूल्य अभिवृद्धि कर कार्यान्वयनमा ल्याइएको थियो। २०६९ कात्तिक २ गतेको मन्त्रिपरिषदको बैठकले हरेक वर्ष मंसिर १ गते कर दिवस मनाउने निर्णय गरेअनुरुप नै यो दिवस मनाउन लागिएको हो।