बेवारीसे शवको समयमै व्यवस्थान नगर्दा दुर्गन्ध बढेको स्थानीयले गुनासो गरेका छन । एक साता पहिले प्रहरीले झिमरुक नदि किनारमा फेला पारेर प्यूठान नगरपालिका ४ बिजुवार स्थित पोष्टमाटम घरमा राखेको शवका कारण दुर्गन्ध बढेको स्थानीयको गुनासो छ ।

सडक छेउमै रहेको अव्यवस्थीत पोष्टमाटम घरमा शव रहेकाले समस्या भएको स्थानीय बिरेन्द्रकुमार श्रेष्ठले गुनासो गरे । विद्युत लाइन गएको समयमा शव गृहमा राखिएको फ्रिज बन्द हुने र त्यो समय वरिपरि बस्न नसकिने गरि शवको गन्ध आउने गरेको स्थानीय सत्यदेवि श्रेष्ठले बताइन ।

बिजुवार मित्रमणी चोक देखि सुनारटोल जाने सडक किनार स्थित बस्ती बिचमै शव गृह राखिएकाे कारण यहाँका स्थानीयले सधै यस्तै समस्या वेहोर्नु परिरहेको स्थानीय सूर्या श्रेष्ठले बताइन । बस्ती नजिकै रहेको शव गृह हटाउन स्थानीयले लामोसमय देखी माग गरेपनि सुनुवाइ नभएको बताए । शव ल्याएर सरोकारवाला निकायले व्यवस्थापन गर्न ढिलाइ गरेको साे स्थानीयवासीको गुनासो छ । यसरी बस्ती बिचमै रहेको शव गृहमा लामो समयसम्म बेवारीसे शव राख्न नहुने प्यूठान नगरपालिकाका निवर्तमान मेयर अर्जुनकुमार कक्षपतिले बताए । उनले स्थानीयको गुनासोबारे प्रहरीलाई जानकारी गराएको बताए । बेवारीसे शव व्यवस्थान गर्न ढिलाई भएको भन्ने गुनासो आएको जिल्ला प्रहरी प्रमुख डिएसपी सत्यनारायण थापाले बताए । उनले चाडै शवको व्यवस्थापन गरिने बताए ।