विप्लव नेतृत्वको नेपाल कम्युनिष्ट पार्टीले आज रोल्पा बन्द गरेको छ । बन्दका कारण रोल्पा जिल्लाको जनजीवन प्रभावित बनेको छ । आफ्नो पार्टीका जिल्ला सेक्रेटरी सन्तोष सुवेदी प्रयासलाई प्रहरीले पक्राउ गरेको बिरोधमा रोल्पा बन्द गरिएको नेकपा रोल्पाले जनाएको छ ।

बन्दका कारण बिहानैदेखि जिल्ला भित्रिने र बाहिरीने कुनै पनि सवारी साधन चलेका छैनन् भने शैक्षिक संस्थाहरु पनि पुर्ण बन्द रहेका छन् । जिल्ला भरका बजार बन्द छन्। बिप्लव कार्यकर्ताले सदरमुकाम लिवाङमा रहेको रोल्पा नगरपालिका– वडा .न. ४ लगायत जिल्लाका भरका अधिकांश वडा कार्यालयहरुमा समेत तालाबन्दी गरेका छन्।

रोल्पा जिल्लाका प्रमुख जिल्ला अधिकारी गञ्जबहादुर एमसिले जिल्लाका केहि वडा कार्यालयमा ताला लगाएको आफुलाई जानकारी आएको बताउनुभयो । वडा अध्यक्ष र प्रहरी संगको समन्वयमा ताला खोल्ने तयारी भइरहेको उहाँले बताउनुभयो रोल्पा प्रहरी प्रमुख डिएसपि दिपक खड्काका अनुसार प्रहरी टाढा रहेका वडा कार्यालयहरुमा ताला लगाइएको छ ।

उता बिप्लव नेतृत्वको नेकपाले भने आफ्नो पार्टीका जिल्ला सेक्रेटरी प्रयासलाई प्रहरीले नछोडेसम्म वडा कार्यालयहरुलाई कामकाज गर्न नदिने नेकपा रोल्पाले बताएको छ ।