प्यूठानमा औलो रोग सम्वन्धी अन्तरकृया कार्यक्रम गरीएको छ । विश्व औलो रोग दिवसको अवसरमा मंगलबार स्वास्थ्य कार्यालय प्यूठानको आयोजनामा जिल्लाका संचारकर्मी तथा विभिन्न सरोकारवालाहरु संग छलफल गरिएको हो ।

शुन्य औलो अबको थालनी नविनतम कार्य, कार्यान्वयनमा लगानी भन्ने नाराका साथ यसपटकको विश्व औलो दिवस मनाईएको छ । पहिले तराइका जिल्लाहरुमा यो रोगको प्रभाव वढि देखिन्थ्यो देखिन्थ्यो तर पछिल्लो समय पहाडी जिल्लाहरुमा पनि औलो रोगका विरामीहरु वर्षेनी देखिन थालेका छन ।

अबको समय वर्षायामको समय भएकोले लामखुट्टेको टोकाईबाट बच्न विद्यालय स्तरमा कार्यक्रम गरे प्रभावकारी हुने स्वास्थ्य कार्यालय प्यूठानका प्रमुख तथा बरिष्ठ जनस्वास्थ्य अधिकृत हेमराज पाण्डेको भनाई छ ।

एनाफिलिक्स जातको पोथि लामखुट्टेबाट यो रोग सर्ने भएकोले लामखुट्टेको टोकाई बाट बच्नुनै यसको उपाय रहेको पाण्डेको भनाई छ ।

चालु आर्थिक वर्ष ०७९÷०८० मा प्यूठानमा पनि ३ जनामा औलो रोगका संक्रमित भेटिएको स्वास्थ्य कार्यालयको तथ्याङ्कमा छ ।

औलोरोग निवारण गर्न सम्पुर्ण नागरीकहरु सजग हुनु पर्ने प्रमुख जिल्ला अधिकारी मदन कोइरालाले बताए ।

वि.स. २०१५ बाट औलोरोग निवारण कार्यक्रम थालनी भएपनि हाल सम्म यसको निवारण भएको छैन । नेपाल सरकारले सन २०२५ सम्म औलोरोग निवारण गर्ने लक्ष्य लिएको छ ।