प्रधानमन्त्री केपी शर्मा ओलीले युद्ध महान थियो भने किन  त्यो बाटो छाडेको भन्दै माओवादीलाइ प्रश्न गरेका छन् । हिंसाको महिमा मण्डन नगर्न माओवादी केन्द्रलाई चेतावनी दिदै उनले युद्ध महान नभएको बताए ।

उनले भने, ‘देशमा हिंसा थियो त्यसलाई व्यवस्थापन गर्नुपर्यो। त्यसलाई केही मान्छेहरुले महिमामण्डन गरेको सुन्छु। त्यस्तो महान थियो भने किन छोड्या त त्यो बाटो ? किन आउनुपर्यो शान्ति प्रक्रियामा ? महान जनयुद्ध नै थियो भने त सफल पार्नुपर्थ्यो। जनयुद्ध हो भने त्यो फेल हुँदैन। जनआन्दोलन हो भनेपनि फेल हुँदैन।’

उनले आफुहरुले गरेको झापा आन्दोलन पनि सहि नभएरै बदलिएको बताए । उनले भने,‘मैले पनि झापा आन्दोलनताका जुन नीति लिएको थिए त्यो सही नीति भएनछ अगाडि बढ्नको लागि बदलियो। सही भएन त बदल्नुपर्छ। त्यसैले अरुले बनाएका अनावश्यक हिंसा छोड्नुपर्छ बदल्नुपर्थ्यो। बदल्यौं। हिंसाको महिमा गरेर हामी अगाडि बढ्न सक्दैनौं। त्यसले फेरि खतरा ल्याउँछ ।’