विना पूर्व तयारी सडक वरपरका संरचना हटाउन ३५ दिने सूचना जारी गरेको प्यूठान नगरपालिकाले बेलुवा–बाग्दुला सडकको विषयमा पुनः नागरिकसँग छलफल थालेको छ ।

श्रावण ७ गते सडकको १५ मिटरभित्र रहेका संरचना हटाउन र नहटाएमा कानुन बमोजिम हुने सूचना जारी गरेको नगरपालिका नगर बासीको विरोध र आलोचनापछि छलफलमा लागेको हो ।

व्यापारको मुख्य सिजन चाडपर्वको मुखमा पूर्व जानकारीविना चेतावनीपूर्ण सूचना आएसँगै सडक छेउका व्यापारीले समेत नगरपालिकाको कदमको विरोध गरेका थिए । मार्किङ नगरीकनै सूचना जारी गरेपछि सडक छेउका स्थानीय पनि सशङ्कित बनेका हुन् ।

३५ दिने सूचनाको ३ दिन मात्र म्याद रहँदा नगरपालिकाले आइतबार वडा नं. १ र २ बाट छलफल थालेको छ । छलफलमा सम्बोधन गर्दै नगरपालिकाका मेयर विष्णु योगीले क्षति हुने सवैका लागि क्षति पूर्ति दिन नसकिने तर, पूर्ण विस्थापित हुनेको हकमा नगरपालिकाले निर्णय गर्ने बताए ।