प्यूठान अस्पतालमा पहिलो पटक ११ औँ तहका चिकित्सक मेडिकल सुपरिटेन्डेन्ट बनेर आएका छन् । बिहिवार एक कार्यक्रमका बिच हाड जोर्नी तथा नसा रोग विशेषज्ञ डा. ओम प्रसाद अर्याललाई स्वागत गरिएको छ ।

प्यूठान अस्पताल विकास समितिका अध्यक्ष विजय बिराज विष्टको अध्यक्षतामा भएको स्वागत तथा बिदाइ कार्यक्रममा प्रमुख अतिथि प्रतिनिधि सभा सदस्य सूर्य बहादुर थापा क्षेत्रीले डा. अर्याललाई स्वागत गर्दै यसअघि निमित्त मेडिकल सुपरिटेन्डेन्ट रहेका हाड जोर्नी तथा नसा रोग विशेषज्ञ डा. राजेन्द्र पौडेलले खेलेको भूमिकाको प्रशंसा गरेका थिए ।

प्यूठान अस्पतालमा भएको स्वागत तथा बिदाइ समारोहमा अध्यक्ष, प्रमुख अतिथि, जनप्रतिनिधि, अस्पतालका कर्मचारी, पत्रकार लगायतले स्वागत तथा बिदाइ गरेका थिए ।

अस्पतालमा आएका नयाँ मेडिकल सुपरिटेन्डेन्ट डा. ओम प्रसाद अर्यालले अस्पतालको सेवा प्रवाहलाई चुस्त बनाउन आफू लागिपर्ने र त्यसका लागि जिल्लाको सबै क्षेत्रको सहयोग महत्त्वपूर्ण हुने बताए ।

बिदाइ भएका डा. पौडेलले आफू जहाँ भए पनि प्यूठान जिल्लावासीको उपचारमा सहयोग गर्ने बताए । २ वर्षदेखि प्यूठान अस्पतालमा रहेका पौडेलको पाल्पा अस्पतालमा सरुवा भएको छ ।