स्वर्गद्वारी नगरपालिकामा सञ्चालित आँखा जाँच शिविरमा ७ सय ४० जनाले आँखा जाँच गराएका छन् । ५० वर्ष माथिको उमेरका आँखाको अपरेसन गर्नुपर्ने नागरिकको पहिचानका लागि नगरपालिकाले ६ स्थानमा शिविरको आयोजना गरेको थियो ।

बिहीबारदेखि सञ्चालित शिविरमा १ सय जनाको अपरेसन गर्नुपर्ने पहिचान गरिएको स्वर्गद्वारी नगरपालिकाका प्रवक्ता सुरज सङ्गम सुनारले बताए । नगरपालिकाले बिरामीको पहिचान, अपरेसनका लागि तिलगंगा सर्किजल आँखा केन्द्र राप्ति दाङ पुग्न यातायात खर्च, अपरेसन शुल्क सबै ब्यहोर्ने गरी कार्यक्रम तय गरिएको स्वर्गद्वारी नगरपालिकाका प्रमुख प्रशासकीय अधिकृत विमल रिजालले बताए ।

स्वर्गद्वारी नगरपालिकाले तिलगंगा सर्किजल आँखा केन्द्र राप्ति दाङको प्राविधिक सहयोगमा शिविर सञ्चालन गरेको हो । बिहीबार वडा नं.  १ कोचिवाङ, शुक्रवार वडा नं. २ खाल, शनिवार वडा नं. ५ सारी, आइतबार वडा नं. ९ गोठिवाङ, सोमबार वडा नं. ६ बेलवास र मङ्गलवार वडा नं. ४ भिंग्रीमा स्कृनिङ शिविरको आयोजना गरेको हो ।

स्वर्गद्वारी नगरपालिकाका नगरप्रमुख टेकप्रसाद भण्डारीले नगरवासीको आवश्यकतालाई ध्यानमा राखेर यो कार्यक्रम तय गरिएको बताए । उपचार अभावमा नागरिकको दृष्टि शक्ति नहराओस् भनेर यो कार्यक्रम राखिएको उनको भनाई छ । उपचार गरेर देख्न सक्ने धेरै नागरिकले आर्थिक अभावमा अन्धकारमा बसिरहेकाले यो कार्यक्रम सञ्चालन गरिएको नगरपालिकाका उपप्रमुख मिनराज राना मगरले बताएका छन्।