प्यूठानको झिमरुक गाउँपालिका वडा नं. ५ ओखरकोटमा निर्मित नेपाल टेलिकमको टावर सञ्चालनमा आएको छ। बिहिबार प्रतिनिधि सभा सदस्य सूर्य बहादुर थापा क्षेत्रीले टावरको उद्घाटन गरेका हुन्।

२०७७ सालदेखि निर्माण सुरु भएपनि सञ्चालनमा आउन नसकेको उक्त टावर १८ सय मेगाहर्जमा चल्ने गरी सञ्चालनमा आएको छ। कार्यक्रममा प्रदेश सभा सदस्य निमा गिरी, नेपाल टेलिकम तुलसिपुर शाखा प्रमुख सन्तोष शर्मा, विजुवार शाखा प्रमुख निराजन श्रेष्ठ लगायतको उपस्थिती रहेको थियो।

टावर उद्घाटन संगै सांसद थापाले सञ्चार तथा सूचना प्रविधि मन्त्री पृथ्वि सुब्बा गुरुङ्गसंग टेलिफोन संवाद गरेका थिए। संवादमा मन्त्री गुरुङ्गलाई तिखाचुली, चुँजा, दाङवाङ्ग, डाम्री र स्वर्गद्वारीमा विगतमा संरचना बनेर पनि सञ्चालनमा नआएका टावर सञ्चालनमा ल्याउनेबारे ध्यानाकर्षण गराएका थिए।

सांसद थापाले केही दिनअघि सरुमारानीको सौराकोटको टावर उद्घाटन गरेका थिए।