लुम्बिनी प्रदेशका मुख्यमन्त्री चेतनारायण आचार्यले युवा पीडे सचेत र जिम्मेवार भए सवारी दुर्घटनामा कहि आउने बताएका छन् । प्रदेश स्तरीय सडक सुरक्षा सम्बन्धी कार्यशाला गोष्ठीलाई लमहीमा मंगलबार सम्बोधन गर्दै मुख्यमन्त्री आचार्यले लुम्बिनी प्रदेशमा सबैभन्दा बढी मोटरसाइकल दुर्घटना हुने गरेको र त्यसमा विशेषगरी १६ देखि ३० वर्ष उमेर समूहका युवाको संलग्नता हरेको बताएका । उनले यस विषय प्रदेश सरकारका लागि सबैभन्दा ठूलो चुनौती र चिन्ताको विषय बनेको बताए ।

मुख्यमन्त्री आचार्यले विद्यालय तहदेखि नै सडक सुरक्षा सम्बन्धी सचेतना र अभिमुखीकरण कार्यक्रम सञ्चालन गर्नुपर्ने आवश्यकता रहेको बताए । संघ, प्रदेश र स्थानीय तहबीच समन्वय तथा सहकार्य गरेर युवालाई प्रशिक्षित र अनुशासित बनाउन ढिला गर्न नहुने उनले बताए । प्रदेश सरकारले यसमा आवश्यक साझेदारी गर्न तयार रहेको बताउदै आचार्यले दाङ, बाँके, कपिलवस्तु र रुपन्देहीमा सवारी दुर्घटना बढी हुने गरेको बताए । तीव्र गतिमा सवारी चलाउने प्रवृत्ति र लागूऔषधको प्रयोग दुर्घटनाका प्रमुख कारण रहेको बताए । लागूऔषध नियन्त्रणमा सबै जिम्मेवार निकायले प्रभावकारी भूमिका खेल्नुपर्नेमा उनले जोड दिए ।
मुख्यमन्त्री आचार्यले पुराना सवारीसाधन, गुणस्तरहीन सडक र चालकको लापरबाहीले पनि दुर्घटना बढाइरहेको उल्लेख गर्दै प्राविधिक रूपमा उपयुक्त र गुणस्तरीय सडक मात्र निर्माण गर्नुपर्ने बताए । ‘बलियो र गुणस्तरीय सडक निर्माण भएपछि सवारी दर्घटना घटाउन सकिन्छ,’ उनले भने,‘यत्तिले मात्र पुग्दैन युवा पीडलाइ सचेत पनि गराउन जरुरी छ ।’

उनले नागरिक समाजलाई सुसूचित गर्दै बालबालिकालाई कुलतबाट टाढा राख्नुपर्ने, समाजमा बढ्दै गएको विकृति, विसंगति र अराजकता नियन्त्रण गर्न सबै पक्ष जिम्मेवार बन्नुपर्ने आवश्यकता औँल्याए । दुर्घटनापछि घाइतेको समयमै उद्धार र उपचारको व्यवस्था सुनिश्चित गर्दै मानवीय भावना र जिम्मेवार समाज निर्माण गर्न पनि उनले आग्रह गरे।

प्रदेश नीति तथा योजना आयोगका फोकल पर्सन शंकरसिंह धामीले लुम्बिनी प्रदेशको पाँच वर्षको सडक दुर्घटना विश्लेषण प्रस्तुत गर्दै प्रदेशमा आर्थिक वर्ष २०७७÷७८ देखि २०८१÷८२ सम्म ७ हजार ८ सय ६६ सवारी दुर्घटना भएको जानकारी दिए । ती दुर्घटनामा २ हजार ५ सय २५ जनाको मृत्यु, ५ हजार ४ सय १६ जना गम्भीर घाइते र ६ हजार ८ सय ४ जना सामान्य घाइते भएका छन् ।
लुम्बिनी प्रदेशमा दुर्घटनामा संलग्न सवारीमध्ये ६ हजार २ सय ७१ वटा दुईपाङ्ग्रे रहेका छन्, जुन कुल दुर्घटनाको करिब ५७ प्रतिशत हो । अधिकांश दुर्घटना साँझ ६ बजेदेखि मध्यरातसम्म हुने गरेका छन् भने करिब ९० प्रतिशत दुर्घटना चालकको लापरबाहीका कारण हुने गरेको विश्लेषणमा उल्लेख गरिएको छ ।