नेपालीहरु विदेशिने क्रमसँगै विदेशमा नेपालीले आफूलाई बिभिन्न स्तरमा स्थापित गर्दै गइरहेको पाइन्छ। अध्ययन-अध्यापन, आ-आफ्नो ब्यबसायसँगै राजनीतिक रुपमा मेयर, काउन्सिलर जस्ता स्थानमा नेपालीहरुले आफूलाई स्थापित गरेका छन्।

हालै बेलायतवासी एक नेपालीले बेलायतको ह्याम्प्सायरको बेजिंगस्टोकस्थित आधा शताब्दी पुरानो सरकारी कलेजमा गभर्नरको रुपमा नियुक्ति पाएका छन्।

बेलायतमा ब्यबसायिक एवम् समाजसेवीको रूपमा परिचय बनाएका शिवजी श्रेष्ठलाई क्रान्बोर्न बिजिनेस एण्ड इन्टरप्राइज कलेज, बेजिंगस्टोकको गभर्निंग बडीले चार वर्ष (२०१८-२२) का लागि गभर्नर नियुक्त गरेको हो।

विद्यालयस्तरमा अन्य केही नेपालीहरु गभर्नरको रुपमा कार्य गरे पनि कलेजस्तरमा सायद उनै पहिलो नेपाली गभर्नर हुनसक्ने अनुमान गरिएको छ। श्रेष्ठले गभर्नरको रुपमा गभर्निङ्गबडीमा रहेर कलेजको प्रमुख, उप-प्रमुखको नियुक्तिदेखि कलेजको भिजन, योजना एबम नीति निर्माण, कलेजको आर्थिक ब्यबस्थापन, कलेजको स्तर, कार्यसम्पादनको सुपरिवेक्षण लगायतका कार्यहरुमा सहभागी हुनुपर्नेछ।