स्थानीय स्तरमा यत्रतत्र रुपमा तितेपाती पाइन्छ । औषधीको रुपमा मात्र नभई धार्मिक कार्यमा समेत यसको उपयोग गरीन्छ । गाउँघरमा यत्तिकै उम्रेको तितेपाती गोडमेल गरी फाल्ने चलन छ । बास्नादार यो खाने भन्दा पनि शरिरका बाहिरी अङ्गमा प्रयोग गर्न बढी लाभदायक मानिन्छ ।

धेरै रोगको उपचार गर्न सहज तरिकाले पाइने हुँदा पनि यसको छुट्टै महत्व छ । तितेपातीको प्रयोग लुतो घाउ खटिरामा यसको पात माडेर ताजा रस लगाउनाले लुतो निको हुन्छ । अनुसन्धानका अनुसार तितेपातीबाट बनेको औषधिबाट मलेरिया निको पार्न सकिने खोज पत्ता लागेको छ । विभिन्न खाद्यान्नलाई बिग्रन नदिन र किरा लाग्नबाट बचाउन परमपरागत रुपमा गाउँघरका किसानहरु तितेपाती प्रयोग गर्छन् ।

यसको उपयोग जडिबुटीका रूपमा र सौन्दर्य प्रसाधन अत्तर बनाउनका लागि पनि प्रयोग गरिन्छ । तितेपातीबाट तेल निकाल्न मिल्ने र यसको तेलबाट हाड दुखाइको औषधि, चिलाउने रोगको औषधि, उच्च रक्तचाप र ज्वरोको औषधि बनाउन सकिने विज्ञहरुको दावी छ । साधारणतया जहाँ पनि हुर्कने भएकोले यो वनस्पती खेती गर्न पनि कुनै कठिनाइ छैन ।

यसैको महत्व बुझेर सरुमारानी गाउँपालिका २, दधेरीका कृषक जागेश्वर पोख्रेलले तितेपातीको खेती गरेका छन् । अरुले बारीमा मौषम अनुसार खाद्यान्न बालीको खेती गर्छन भने पोख्रेलले तितेपाती रोपेका छन् । यिनले आफ्नो बारीमा करिब ७ रोपती क्षेत्रफलमा यो खेती गरेका हुन् । तितेपातीको महत्व बुझेर खेती सुरु गरेका पोख्रेललाई शुभकामना ।