गौमुखी गाउँपालिका–५, खुङमा माध्यामिक विद्यालय सञ्चालन गर्न चन्दा संकलन अभियान थालिएको छ । २०२० सालमा स्थापना भएको जनसहयोगी आधारभूत विद्यालय कक्षा ८ सम्म सञ्चालनमा छ । अहिले कक्षा ८ मा ३६ जना विद्यार्थी पढ्छन्। यिनीहरुलाई गाउँमै कक्षा ९ पढ्ने सुविधा छैन । थप पढ्नका लागि यहाँका विद्यार्थीहरु गाउँदेखि टाढा जानुपर्ने बाध्यता छ ।
यहाँ मा.वि. नहुँदा नारीकोट, ठुलावेसी र गुल्मिको अग्लुङ जानुपर्ने समस्या रहेको अभिभावकहरुको गुनासो छ । मा.वि. तहको पढाइका लागि विद्यार्थीहरुलाई कठिनाई भएको भन्दै विद्यालय व्यवस्थापन समितिले पुस २५ गते मुल आयोजक समिति गठन गरेको थियो । यो समितिले मा.वि. सञ्चालनका लागि माघ महिना लागेदेखि चन्दा संकलन अभियान चलाएको संयोजक निराजन मल्लले बताए ।
अहिलेसम्म करिब ४८ लाखभन्दा बढी रकम संकलन भइसकेको उनको भनाई छ । चन्दा संकलनका लागि समितिका मुल आयोजक समिति बनाएर संकलन अभियान चलिरहेको वडा अध्यक्ष हुम बहादुर के.सी.ले बताए । अहिलेसम्म संकलन अभियानमा गाउँका सबैजनाको साथ रहेको उनले बताए । माध्यामिक तहको कक्षा सञ्चालनका लागि गाउँपालिकाबाट स्विकृत पाएको बताउँदै व्यवस्थापन समिति अध्यक्ष बरुणध्वज मल्लले सामाजिक सञ्जाल, गाउँका अगुवा बुद्धिजिवी र गाउँबाट जिल्ला बाहिर बसाइ सरेका ब्यक्तिहरुले सहयोग गरेको बताए ।
गाउँका विद्यार्थीहरुलाई शिक्षाको उज्यालो छर्ने अभियानमा सहयोग गर्ने सहयोगदाताहरुलाई विद्यालयले औपचारिक कार्यक्रमको आयो जना गरी सम्मान कार्यक्रम गरीने उनको भनाई छ । आगामी शैक्षिक सत्रबाट मा.वि. तहको कक्षा ९ सञ्चालन गर्ने गरी आर्थिक सहयोग संकलनको काम भइरहेको हो ।
