सिद्धार्थ सामाजिक विकास केन्द्र वाणगंगा ४ कपिलवस्तुले प्यूठान अस्पतालमा उपचाररत एक बालकलाई आर्थिक सहयोग गरेको छ । बाल संरक्षण र मनोसामाजिकको क्षेत्रमा काम गर्दै आएको उक्त संस्थाले प्यूठान माण्डवीका ६ वर्षिय बालक संजित मिजारलाई सहयोग गरेको छ । शुक्रबार अस्पतालमै पुगेर ५ हजार नगद उपचार र पोषण खर्चका लागि उपलब्ध गराएको मनोसामाजिक कर्ता जया पोख्रेलले बताइन । हिंसामा परेका १८ वर्ष भन्दा मुनिका बालबलिकालाई उक्त संस्थाले संरक्षण र सहयोग गर्दै आईरहेको पोख्रेलले बताइन ।

संस्थाले बालबालिकाको क्षेत्रमा सहयोगसंगै महत्वपूर्ण काम गरेको भन्दै अस्पतालका निमित्त प्रमुख खिम प्रसाद पार्धेले धन्यवाद समेत दिएका छन । स्वास्थ्य कार्यालय प्यूठान (किड्स नेपाल)को पहलमा संजितलाई गत बुधबार प्यूठान अस्पताल ल्याइएको थियो ।

प्यूठान अस्पतालका बालरोग विषेशज्ञ डा. सौरभ श्रेष्ठका अनुसार बालकलाई कुपोषिण र छातीमा संक्रमण भएको छ । बालकलाई केहिदिन अस्पतालमै भर्ना गरि उपचार गर्नुपर्ने भएको श्रेष्ठले बताए । बालककी आमाले पैसा नभएका कारण अस्पतालमा बस्न मानेकी थिइनन् । उनको आर्थिक अवस्था कमजोर भएका कारण निःशुल्क उपचार गरिएको थियो ।

बालकको स्वास्थ्य अवस्थामा सुधार हुदै गएको डा. श्रेष्ठले बताए । पौष्टिक आहारको कमि र खानपानको समस्याले कुपोषित भएको श्रेष्ठको भनाई छ ।
सिद्धार्थ सामाजिक विकास केन्द्रले बालकलाई आर्थिक रकम उपलब्ध गराएकोमा बालककी आमा हर्षित छिन ।