प्रदेश स्तरीय स्वर्गद्वारी प्यूठान पाँचौ महोत्सव २०७९ तयारीको लागि सर्वपक्षीय भेला बुधबार होटल आयुष्मा जुम्रीमा सम्पन्न भएकोे छ । जिल्लाका विभिन्न तहमा रहेका सरोकारवालाहरु सँगको उपस्थितिमा महोत्सवलाई कसरी गर्दा उत्तम हुन्छ भन्ने विविध विषयमा छलफल भएको हो । छलफलमा बोल्ने वक्ताहरुले पहिलो प्राथमिकतामा समय निर्धारणको बिषयलाई उठाएर सवाल जवाफ गरेका थिए । विगतका समयमा भएका महोत्सवले प्यूठानी जनतालाई के उपलब्धी दियो ? बिजुवार फाटँमा रहेको गणतान्त्रिक खेलमैदान नाममा मात्र सिमित हुँदा अस्तव्यस्त रहेको ? उद्योग बाणिज्य संघले महोत्सवको आयोजना गरिसकेपछि पनि लामो समयसम्म आयव्य सार्वजनिक सुनुवाई नगर्नेनगरेको, सबै किसानहरुलाई प्रोत्साहन गर्न सके उत्पादन बढाउन सहज हुने जस्ता बिषयहरुमा गुनासो तथा सुझाव दिएका थिए ।

लुम्बिनी प्रदेश सभा सदस्य तुलसीराम शर्माले विगत देखी नै सुरु भएको महोत्सवले जिल्लाको विकास र समृद्धिमा पहल गरिरहेको बताएका छन् । प्रदेश स्तरीय स्वर्गद्वारी प्यूठान पाँचौ महोत्सव २०७९ तयारीको लागि सर्वपक्षीय भेलालाई सबंोधन गर्ने क्रममा उनले यस्तो बताएका हुन् । उनले भने, कुनै पनि कामलाई पछि नहटाई सबै पक्षलाई समेटेर अगाडी लिएमा बिकासको संभावना बोकेको छ । नकरात्मक कुरालाई मिचेर सकारात्मक तर्फ लाग्न आग्रह गर्दै जिल्लाका स्थानीयले सोचेजस्तो राम्रो कामको संदेश महोत्सवले दिन सकोस भनि अनुरोध समेत गरे ।

सुझाव तथा गुनासोको जवाफ दिदै प्यूठान उद्योग बाणिज्य संघका प्रमुख पशुपति नारायण नकर्मीले हुन लागेको पाँचौ महोत्सव २०७९ को कार्यसम्पादन प्रस्तुत गरे । कार्यसम्पादनमा उनले गौतम बुद्धको जन्मस्थानको नामबाट नामाकरण गरिएको लुम्बिनि प्रदेश भित्र रहेका स्वर्गद्धारी लगायतका मुख्य पर्यटकिय क्षेत्र र सहायक पर्यटकिय क्षेत्रहरुको प्रचारप्रसार, स्वदेशी उद्योगबाट उत्पादित बस्तुहरु तथा उपकरणहरु, घरेलु तथा लघु उद्यमका उत्पादनहरु, यस जिल्लामा रहेका औधोगिकिकरण कच्चा पदार्थ, जडिबुटी, नेपाली कागज, मह, हर्बल सावुन, अल्लोबाट उत्पादित बस्तुहरु लगायतका स्थानीय उत्पादन राष्ट्रिय तथा अन्तराष्ट्रिय उद्योगहरुका उत्पादन समेतको प्रदर्शन हुने बताए । प्यूठानमा उत्पादित बस्तुहरुलाई बढि प्राथमिकतामा राख्ने समेत बताएका छन् । खेलकुदको बारेमा बुझेको र आफुलाई चासो रहेको भन्दै उहाँले खेलकुदको बिषयमा आफु पछि कहिल्यै नहट्ने बताएका हुन् । कृषकहरुले उत्पादन गरेको बालिहरुको बारेमा प्यूठान उद्योग बाणिज्य संघले स्थानीय तहसँग समन्वय गर्ने बताउदै संघले महोत्सव सम्पन्न भएको एक महिनाभित्रमा आयव्यको विवरण सार्वजनिक गर्ने नकर्मीले बताए ।