जिल्ला अस्पतालमा डेलिभरी गराउने सेवाग्राहीहरुको संख्या बढ्दै गएको कार्यक्रमका प्रशिक्षक रीता न्यौपानेले बताईन् । स्वास्थ्य कार्यालय प्यूठानले आयोजना गरेको मातृ तथा नवजात शिशु स्वास्थ्य सेवा अभिमुखीकरण तथा समिक्षा कार्यक्रममा उनले यस्तो बताएकी हुन् । गर्भवती महिलाहरु सुरक्षित रुपमा डेलिभरी हुन्छ भन्ने विश्वासकासाथ गाउँका वर्थिङ सेन्टर तथा स्वास्थ्य चौकी छाडेर जिल्ला अस्पताल पुग्ने गरेको न्यौपानेले बताएकी छन् ।

साथै उनले स्वास्थ्य चौकी तथा वर्थिङ सेन्टरबाटै गर्भवती महिला, आमा तथा नवजात शिशुलाई गुणस्तरीय स्वास्थ्य सेवा उपलब्ध गराउने उद्देश्यले अभिमुखीकरण कार्यक्रम गरिएको बताईन् ।

त्यस्तै अभिमुखीकरण कार्यक्रममा मातृ तथा नवजात शिशु सम्बन्धी जानकारी, गर्भवती महिला, आमा तथा नवजात शिशुको स्याहार, हेरचाह, डेलिभरी भएको ४२ दिन सम्म आमा र शिशुको हेरचाह कसरी गर्ने, मातृ मृत्युदर तथा शिशुमृत्युदर घटाउन कसरी सकिन्छ लगाएतका विषयमा सहभागीहरुलाई अभिमुखीकरण गराइएको छ । स्वास्थ्य कार्यालय प्यूठानका प्रमुख मधुसुदन खड्का सहितका ४ जना फोकल प्रशन र प्यूठान अस्पतालका एमडिजिपी डा. सन्तोष केसी लगाएतले प्रशिक्षण गराएका थिए ।

स्वास्थ्य कार्यालय प्यूठानको आयोजनामा संचालित कार्यक्रम माघ ३ गतेबाट सुरु गरिएको थियो । कार्यक्रममा जिल्लाका नौ वटै स्थानीय तहका करिब ५४ वटा वर्थिङ सेन्टर तथा स्वास्थ्य चौकीमा कार्यरत् नसिङ स्वास्थ्यकर्मी एवम् मातृ तथा नवजात शिशु स्वास्थ्य सेवामा संग्लन चिकित्सकहरु सहभागी भएका थिए ।