काठैको छ बगेनी, काठैको छ बाघ, काठैका छन राजा, काठैकी छिन रानी, यस्तै भगवान गौतम बुद्ध, गाई लगायतका मुर्ति स्टल न. १२ मा गएपछि हेर्न सकिन्छ । आज(बिहीबार)देखि सुरु हुने स्वर्गद्वारी प्यूठान पाँचौ महोत्सवमा आफ्नो कला देखाउन बसेका छन् प्यूठान नौबहिनी गाउँपालिका ८ पोप्लीका यमलाल पुन ।

आयोजक प्यूठान उद्योग बाणिज्य संघले स्थानीय कलालाई प्रोत्साहन गर्न उनलाई निःशुल्क स्टलको व्यवस्था गरेको छ । काठबाट बनाएका हस्तकलाका मुर्तिहरु उनले प्रदशर्नीमा राखेका छन् ।
नौबहिनी ८ फोप्ली गैराथोकमा बस्दै आएका उनी बर्षले अहिले ५३ वर्षका भए । पुनले पहिले पानी घट्टा चलाउने काम गर्थे । गाउँमा बिद्युत पुगेपछि पानी घट्ट चलेन ।

घरायसी काम गर्नेक्रममा रुखबाट खसेपछि उनी अपाङ्ग भएपछि हस्तकला चित्रमा लाग्न सुरु गरे । पुनले विद्युतिय मेसिनको प्रयोग नगरी हस्तकलाको माध्यमबाट काठका विभिन्न चित्रहरु बनाउँदै आएका छन् ।
अहिले उनी काठबाट विभिन्न महत्व बोकेका राष्ट्रिय देखी अन्तराष्ट्रिय स्तरसम्मको चित्रहरु बनाउने गरेका छन् । उनले भगवान गौतम बुद्धको मुर्ति, पृथ्वी नारायण शाह, बघेनीको पाठेघर, गणेश भगवान, राष्ट्रिय जनावर गाईको चित्र, दुम्सी, नागेनी लगायतका चित्रहरु बनाएका छन् ।