झिमरुक गाउँपालिका अध्यक्ष पित बहादुर महतरा क्षेत्रीले महिला दिदिबहिनी चुलो चौकोमा मात्र सिमित नभएर समाज रुपान्तरणको अभियानमा अगाडि बढ्नुपर्ने बताएका छन् ।
बुधबार झिमरुक गाउँपालिकाले आयोजना गरेको ११३ औं अन्तराष्ट्रिय श्रमिक महिला दिवसका अवसरमा पालिका स्तरीय लोकगित तथा नृत्य प्रतियोगितामा शुभकामना मन्तव्य ब्यक्त गर्दै अध्यक्ष एमसीले आधा आकाश ढाकेका महिलाहरु हरेक काममा सक्षम भएकोले ढुक्क भएर अगाडि बढ्नुपर्ने बताएका हुन् । महिला पुरुष एकता बिना समाज रुपान्तरण हुन नसक्ने भन्दै सबै मिलेर राष्ट्र निर्माणमा लाग्नुपर्नेमा जोड दिए । उनले भने “हरेक क्षेत्रमा महिलाहरूलाई अर्थपूर्ण सहभागिता गराएर लैजानुपर्ने हुन्छ ।”
त्यस्तै गाउँपालिका उपाध्यक्ष प्रमोद पोख्रेलले मुलुकमा महिलाहरुको अधिकार प्राप्त भएकोले महिलाहरु स्वतःस्फूर्त रुपमा अगाडि बढ्नुपर्ने बताएका छन । उनले भने “अधिकार मात्र खोजेर हुदैन अधिकार प्राप्तीका लागि आफै लड्नुपर्दछ ।” महिलाहरू प्रबिधिसँग जोडिएर अधिकार र पहुँच स्थापित गर्नुपर्ने बेला भएकोले यस तर्फ सबै महिलाहरु लाग्नुपर्ने बताएका छन् ।

महिलाको बिषयमा संविधानले विभिन्न अधिकारको ब्यवस्था गरेपनी कार्यान्वयन पक्षमा केही कठिनाई रहेकोले सबै सरकारवाला निकाय जिम्मेवार भएर अधिकार स्थापित गर्न लाग्नुपर्ने कार्यपालिका सदस्य संगीता परियारले बताईन् । पालिकाले महिलाका बिषयमा बनाएका योजना तथा कार्यक्रमहरुको जिम्मा महिलाहरूलाईनै कार्यान्वयनमा लैजान दिनुपर्ने उनको भनाइ थियो ।

यसैबिच गाउँपालिकाले आयोजना गरेको लोकगित तथा नृत्य प्रतियोगितामा पालिकाभरबाट २४ टिम सहभागिता रहेको आयोजकले जनाएको छ । लोकगित तथा नृत्य प्रतियोगितामा लैङ्गकि समानता महिला हिंसा न्यूनीकरणमा सहयोग पुग्ने गरि स्वर, लय, भाका भेषभुषा पोशाक नृत्य बाद्यवाधन लाई मुख्य आधार मानेर मुल्याङ्कन गरिएको आयोजकले जनाएको छ । दिवस कार्यक्रममा अहिले लोक गीत तथा नृत्य प्रतियोगिता भईरहेको छ ।

एक टिममा कम्तिमा १० जनाले समुहमा सहभागिता जनाएका थिए । कार्यक्रममा प्रथम द्धितिय तृतीय हुने सहभागीहरुलाई क्रमश १४ हजार १२ हजार १० हजार र सान्त्वना हुनेलालाई ८ हजार नगद र प्रमाण पत्र प्रदान गरिने यामलाल पोख्रेलले बताए ।