प्यूठानमा धूमधामसँग माघी पर्व मनाइएको छ । विभिन्न समुदायले आआफ्नो परम्परा अनुसार मङ्गलवार माघी/माघे सक्रान्ती मनाएका छन् । माघी/माघे सक्रान्तीको अवसरमा विभिन्न ठाउँमा मेलाहरू सम्पन्न भएका छन् ।

प्यूठान नगरपालिका ४ बाझोवारिमा माघी मेला सम्पन्न भएको छ ।

मेलामा मगर सस्कृती झल्कने नाचगान, विभिन्न रोटी परौठा, सेल रोली लगायत स्थानीय परिकार र राष्ट्रिय तथा स्थानीय कलाकारको प्रस्तुतिको आकर्षण रहेको थियो । बाझोवारिमा यो वर्ष लोक तथा दोहोरी गायक खुमन अधिकारी, गायिका सम्झना रणपाल, स्थानीय कलाकार, प्यूठान डान्स आइडल सिजन २ का विजेता कालाकारको  प्रस्तुति राखिएको थियो ।

बाझोवारि माघिमेला आयोजक समितिका संयोजक अम्मर बहादुर केसीको अध्यक्षतामा गरिएको कार्यक्रमको प्रमुख अतिथि प्यूठान नगरपालिकाका उपमेयर देवेन्द्र बर्मा रहेका थिए । कार्यक्रमको सञ्चालन सञ्चारकर्मी बोम बहादुर परियारले गरेका थिए ।

गौमुखीमा पनि माघी मेला सम्पन्न भएको छ । झिमरुक नदिको उद्गम स्थल गौमुखीमा हरेक वर्ष लाग्ने मेला यस वर्ष पनि सम्पन्न भएको हो । मेलामा तिर्थालु भक्तजनहरूको उत्साहजनक उपस्थित रहेको स्थानीय मित्र थापाले बताए ।

ऐरावती गाउँपालिका १ को ऐरावती बगरमा पनि माघी मेला सम्पन्न भएको छ । झिमरुक र माण्डवी नदिको संगमस्थल ऐरावतीमा पौष मसान्त साँझदेखि मेला सुरु हुने गर्दछ । परापूर्वकालदेखी चल्दै आएको मेला धार्मिक जनविश्वाससँग जोडिएको छ ।

त्यस्तै जिल्लाको सरुमारानी गाउँपालिका ४ रानी कुवामा पनि माघी मेला लागेको थियो । २०७५ साल देखी लाग्दै आएको मेला यस वर्ष पनि भव्य रूपमा सम्पन्न भएको वडाध्यक्ष चिन्त बहादुर सोमै मगरले बताए । परापूर्व कालमा भुरेटाकुरे राजाहरू त्यस ठाउँमा बस्ने हुँदा उक्त ठाउँलाई रानी कुवा भनिएको स्थानीय बताउँछन्  । प्राय मगर जातिको बाहुल्यता बढी भएको हुँदा मेलामा स्थानीयहरूले बारा रोटी ,फापरको परौठा , तरुल , बङ्गुरको मासु  लगायतका परिकार राखिएको थियो ।

त्यस्तै माण्डवी गाउँपालिकाको १,३ र ५ नम्बर , अरङखोला र माडी खोलाको सङ्गम स्थल त्रिवेणी धाममा पनि माघी मेला सम्पन्न भएको छ । विगतका वर्षमा जस्तै यस वर्ष पनि उक्त धाममा भक्तजनहरूले बिहान स्नान गरी दिउँसो भजन कीर्तन गरेको माण्डवी गाउँपालिकाका अध्यक्ष नमराज अधिकारीले जानकारी दिए ।