प्यूठानको नौबहिनी गाउँपालिका–१,स्याउँलीबाङका स्थानीयले अल्लो धागो बिक्री गरेर वार्षिक ५० लाख गाउँमा भित्र्याउने गरेका छन् । यस क्षेत्रको जंगल, पाखा, पखेरा र बारी छेउमा उम्रने अल्लोको धागोको डल्लो बनाएर स्थानीय महिलाहरुले व्यापारीलाई बिक्रिगर्ने गर्दछन् ।

स्थानीय व्यापारीले काठमाडौंका व्यापारीलाई बिक्रि गर्ने गरेको स्थानीय व्यापारी धनबहादुर बुढामगरले जानकारी दिए । बुढाले स्थानीय महिलाले संकलन गरेको धागो प्रर्ति किलो १ हजार रुपैयाँमा खरिद गर्ने गरेका छन् ।

धागोलाई प्रसोधन गरेर लाछि बनाउने काममा उनले ३ जना स्थानीय महिलालाई रोजगारी समेत दिएका छन् ।
‘गाउँलेबाट धागोका डल्ला खरिद गर्ने गर्दछौ,’उनले भने, ‘त्यसलाई लाछि बनाएपछि बिक्रि गर्ने गर्दछौ ।’

लाछि बनाउने काम गर्न महिलाहरुलाई किलोको २५ पैयाँया ज्याला दिने गरेको उनले सुनाए । लाछि बनाउने काममा उनले स्थानीय कुमारी बिक, धनी विक र मंगली बिकलाई लगायका छन् ।

धनीराम मात्र नभएर स्याउँलीबाङमा अन्य तीन जना स्थानीय व्यापारीले अल्लो धागो खरिद गरेर काठमाडौका व्यापारीलाई बिक्रि गर्दै आएकाछन् । धनीरामका अनुसार एक वर्षमा स्याउँलीबाङबाट मात्रै ५० क्विन्टल बढी धागो निर्यात हुने गरेको छ ।

यसबाट ५० लाख भन्दा बढी रुपैयाँ गाउँमा भित्रने गरेको छ । यस क्षेत्रमा उत्पादन हुने अल्लो धागोबाट स्थानीयलाई आयआर्जनमा ठूलो टेवा पुगेको डिभिजन वन कार्यालय प्यूठानका प्रमुख संकरप्रसाद गुप्ताले बताए ।

डिभिजन वन कार्यालय प्यूठानको तथ्यांक अनुसार यसवर्ष हालसम्म ५ हजार ३ सय ५० किलो अल्लोधागो निर्यात भइसकेको छ ।