प्यूठानको झिंमरुक फाँट क्षेत्रमा धानबालीमा रोग लागेपछि किसान चिन्तित छन् । रोपाई गरेको एक महिनापछि धानमा रोग लागेर बोट कुहिने,सुक्ने भएपछि किसानका खेत बाँझै देखिन थालेको छ ।
प्यूठान नगरपालिका ४ को जुम्रीफाँट क्षेत्रमा धानमा रोग लागेर सखाप पार्न थालेको स्थानीय किसान बालिका पुनले बताइन् ।

‘पहिले बोट रातो,पहेलो हँुदै सखाप भएको छ,’ उनले भनिन, ‘गोडमेल गरेर मल राखे पनि रोग नियन्त्रणमा आएन ।’ उनको मात्र होइन यस क्षेत्रका धेरै किसानको धानबालीमा रोग लागेर ठूलो नोक्सान गरेको छ । प्यूठानको झिमरुक, खैरा, खप्रेङंगखोला लगायतका फाँट क्षेत्रमा धानमा रोग लागेको प्रधानमन्त्री कृषि आधुनिकीकरण परियोजना धान जोन प्यूठानका प्रमुख चुमान गिरीले बताए ।

‘यो रोग एक प्रकारको रातो गड्यौला हो,’उनले भने, ‘पहिले गड्यौलाले जरा भागमा बसेर नोक्सान गर्छ, त्यसपछि धानको बोट रातो पहेँलो हुँदै सखाप हुन्छ ।’ गिरीले खप्रेङंगखोला र खैरा फाँटमा पुगेर किसानसंग समन्वय गरि विषादि छर्केपछि केहि नियन्त्रणमा आएको बताए ।