जिल्ला प्रशासन कार्यालय प्यूठानको अगुवाइमा जिल्लाका ९ वटै स्थानीय तहहरूमा आगलागी जोखिम न्यूनीकरणका पूर्व तयारी कार्यक्रमहरू सम्पन्न भएका छन् । समिति गठन,पालिका स्तरमा छलफल, अन्तरक्रिया लगायत कार्यक्रम सकिएको जिल्ला प्रशासन कार्यालयले प्यूठानले जनाएको छ । सोही कार्यक्रम अन्तर्गत सोमबार गौमुखी गाउँपालिकामा कार्यक्रम गरेर पहिलो चरणको कार्यक्रम सकिएको प्रमुख जिल्ला अधिकारी रमा आचार्यले बताइन । पालिका स्तरको अन्तरक्रिया कार्यक्रममा आगलागी जोखिम न्यूनीकरण तथा पूर्व तयारीका लागि कार्य योजना बनाएको छ ।  डिभिजन वन कार्यालय प्युठानसँगको सहकार्यमा कार्यक्रम प्रशासनले सबै पालिकाहरूमा कार्यक्रम गरेको हो ।

आगलागीका घटना हुन नदिन समयमै सबै सचेत भएर अगाडि बढ्न आवश्यक रहेकाले सबै पालिकाहरूका कार्यक्रम गरिएको आचार्यले  बताइन  । उनले आगलागी पूर्व जोखिम न्यूनीकरणका लागि अपनाउनुपर्ने सावधानी, कानुनी विषय, खोज तथा उद्धार सम्बन्धी तालिमको योजना समेत बनेको बताइन् ।

कार्यक्रममा आगलागी घटना घटाउने व्यक्तिलाई कानुनी कारबाही बारे जनकारी, वडा स्तरीय आगलागी पूर्व तयारी जोखिम न्यूनीकरण तथा प्रतिकार्य कार्यदल गठन गरिएको छ । कार्य योजना अनुसार वडा अध्यक्ष संयोजक रहने गरी समिति गठन तथा परिचालन गर्ने निर्णय भएको छ । कार्यदलले सम्पर्क ब्याक्ति तोकी प्रत्येक दिनको घटना विवरण जिल्ला सुरक्षा संयन्त्र समितिमा पठाउने छन् ।

आगलागी लाग्न दिनुभएन तर लागि हाल्यो भने पनि नियन्त्रणको पूर्व तयारीमा जुट्नुपर्ने दायित्व वडा, पालिका र सामुदायिक बन र स्थानीय जनताको भएकोले उनीहरूलाई जिम्मेवार बनाउन पालिका स्तरमा कार्यक्रम गरेको आचार्यको भनाइ छ ।

डिभिजन वन कार्यालयका प्यूठानका डिभिजन प्रमुख धनेश्वर न्यौपानेले आगलागी तथा डढेलो नियन्त्रणका लागि  कार्यालय तथा विभिन्न वन उपभोक्ता समूह, समुदायलाई परिचालन गर्ने गरी योजना बनेको बताए । जङ्गलमा अनावश्यक रूपमा बढेको झाडी सफाइ गर्ने, बुट्यान कटान गर्ने काम नियमित गर्न स्थानीय स्तरमा सचेतना हुनुपर्ने उनले बताए । सामुदायिक बन उपभोक्ता समितिले सामुदायिक वनबाट आएको आन्तरिक आम्दानी बन जोगाउने कार्य, डढेलो नियन्त्रण, आय आर्जनका क्षेत्रमा लगानी गरे आगलागीका घटना घट्न सक्ने न्यौपानेले बताए  । ‘आगलागीको मुख्य इन्धन स्याउला, सोत्तर, घाँस हो । आगलागीलाई बढवा दिने बस्तु हावा र आगोको स्रोत सलाई लाइटर भएकोले यसलाई समुदायले सही व्यवस्थापन गर्न पर्छ,’ उनले भने,‘आगलागीको घटनामा कमी ल्याउन सबै पक्ष लाग्नु पर्छ ।’

झिमरुक गाउँपालिका अध्यक्ष पित बहादुर महतरा क्षेत्रीले आगलागी नियन्त्रणको कार्यलाई गाउँ गाउँमा जनचेतनाको रूपमा अभियान चलाउनुपर्ने बताउँछन् । यो अभियान सफल बनाउन सबैको सहकार्य र क्रियाशीलतामा मात्र सम्भव हुने भएकोले अभियानमा जुट्न पर्ने बताउँछन् । ‘अबका ४ महिनामा आगलागीका घटना धेरै हुने गर्छन् । त्यसको लागि पूर्व तयारीमा जुट्नुपर्ने हुन्छ,’ उनले भने, “सकेसम्म आगो लाग्नै नदिने लागिहाल्यो भने आगोलाई सानोमै नियन्त्रणमा लिने प्रयास गर्नुपर्नेमा पहल गरौँ ।”