मल्लरानी गाउँपालिका वडा नं. ५ सरङ्गकोटका मुकुन्द मल्ल तीन वर्षअघि बैदेशिक रोजगारीबाट फर्किए । गाउँमा रोजगारी नहुने र गरिरहेको परम्परागत कृषिबाट आम्दानी पनि नहुने हुँदा ‘अव के गर्ने ?’ भनेर सोचिरहेका थिए । त्यहिबेला गाउँमा समुहमार्फत आधुनिक ब्यवसायिक कृषि खेतीको कुरा आयो । अहिले उनले ब्यवसायिक तरकारी खेती र बाख्रापालन गरिरहेका छन् ।

मल्लजस्तै मल्लरानी गाउँपालिका वडा नं. ३ खैन्डाँडाका कर्ण बहादुर पुन पनि ब्यवसायिक कृषि खेती गरिरहेका छन् । मौसमी तथा बेमौसमी तरकारी खेती गरिरहेका उनले अहिले यो पेशालाई नै आम्दानीको मुख्य श्रोत बनाएका छन् । प्रधानमन्त्री कृषि आधुनिकिकरण परियोजनाले मल्लरानी गाउँपालिकाका कृषकहरुलाई ब्यवसायिक कृषि खेती गर्न सहयोग पुर्याएको छ । कार्यक्रममार्फत मल्लरानी गाउँपालिकामा तरकारी खेतीका लागि १ सय नयाँ टनेल थपिएका छन् । आधुनिक र ब्यवसायिक कृषि खेतीका लागि वडा नं. ३ को खैन्डाँडा र वडा नं. ५ को सरङ्गकोटमा नयाँ टनेल थपिएका हुन् ।

खैन्डाँडाका २ स्थानमा ४ जना कृषकले २९ वटा र सरङ्गकोटका ३ स्थानमा ११ जना कृषकले ७१ वटा नयाँ टनेल थपिएका छन् । प्रधानमन्त्री कृषि आधुनिकिकरण परियोजना, परियोजना कार्यान्वयन ईकाई प्यूठानबाट तरकारी पकेट क्षेत्र स्थापना गर्न कृषकसंग साझेदारी गरिएको कार्यालय प्रमुख चुमान सिंह गिरीले बताए । खैन्डाँडामा मल्चिङ, विउ, विसादी, थोपा सिचाइ र सिचाई पोखरी सहित २९ वटा टनेल निर्माणका लागि कार्यालयबाट ३ लाख ४५ हजार खर्च भएको छ । भने, सरङ्गकोटमा सुक्ष्म खाद्यतत्व , मल ,विउ ,विषादी, सिचाई पोखरी सहित ७१ वटा टनेल निर्माणका लागि कार्यालयबाट ८ लाख ३० हजार खर्च भएको छ । उक्त कार्यक्रममा कृषकको थप ५० प्रतिशत लागत रहेको कार्यालय प्रमुख गिरीले बताए ।

उत्पादित कृषि सामाग्रीको बजारीकरणमा मल्लरानी गाउँपालिकाले सहयोग गर्ने गाउँपालिका अध्यक्ष कृष्ण बहादुर खड्काले बताए ।