२०८१ कार्तिक २९यस वर्ष धान उत्पादन वृद्धि भएपछि प्यूठानका किसान खुसी भएका छन् । उचित समयमा भएको वर्षा, उन्नत जातको धानको बीउ छनोट र रोगको प्रकोप नदेखिएपछि जिल्लामा धान उत्पादनमा वृद्धि भएको हो । एकीकृत कृषि तथा पशुपन्छी विकास कार्यालयको तथ्याङ्क अनुसार गत वर्षको तुलनामा यस वर्ष ३ हजार ३ सय ४६ मेट्रिक टन बढी धान उत्पादन भएको छ ।
उचित समयमा भएको वर्षा, उन्नत जातको धानको बीउ छनोट र रोगको प्रकोप नदेखिएपछि जिल्लामा धान उत्पादनमा वृद्धि भएको हो ।
कार्यालयका प्रमुख उमेशचन्द्र श्रेष्ठका अनुसार यस वर्ष जिल्लामा २५ हजार ३ सय १३ दशमलव ७५ मेट्रिक टन धान उत्पादन भएको छ । गत वर्ष २१ हजार नौ सय ६७ मेट्रिक टन धान उत्पादन भएको थियो । कार्यालयका अनुसार छ हजार पाँच सय ६५ हेक्टर क्षेत्रफलमा धान खेती गरिँदै आएको छ । जिल्लामा सबैभन्दा बढी प्यूठान नगरपालिका र सबैभन्दा कम नौबहिनी गाउँपालिकामा धान उत्पादन हुने गरेको छ । जिल्लामा उन्नत जातका बीउको प्रयोग गर्न थालिएको र मौसमले साथ दिएकाले उत्पादनमा वृद्धि भएको श्रेष्ठको भनाइ छ । उन्नत बिउमा सहयोग पुग्दा धान उत्पादन बढेको प्यूठान नगरपालिका–२ कि कृषक शर्मिला रावतले बताइन । सावित्री जातको उन्नत बिउको प्रयोगले गाउँका किसानहरूको धान उत्पादन बढेको उनले बताइन् । धानको उन्नत बिउ उत्पादनको काम गर्दै आएको विजयनगर साना किसान सहकारी संस्थाको अध्यक्ष समेत रहेकी उनले उन्नत बिउको प्रयोग गर्दा रोगव्याधीमा कमी हुनाले पनि उत्पादन बढेको सुनाइन् ।
प्युठानका केही फाँटहरूमा सीमित सिँचाइ सुविधा उपयोग गरी कृषकले चैते धानको समेत खेती गर्न थालेका छन् । जिल्लाको प्यूठान नगरपालिका, मल्लरानी र ऐरावती गाउँपालिकाको ८० हेक्टर क्षेत्रफलमा चैते धान खेती गरिएको थियो । प्यूठानमा धान उत्पादन वृद्धि तथा प्रोत्साहनमा प्रधानमन्त्री कृषि आधुनिकीकरण परियोजना, परियोजना कार्यान्वयन इकाई ले धान जोनका रूपमा काम गर्दै आइरहेको छ ।
प्यूठानका किसानले चैते पाँच, हर्दिनाथ–एक र हर्दिनाथ–तीन जातका बिउ चैते धानका रूपमा र वर्षा याममा राधा–१२, राधा–१४, सावित्री, हर्दिनाथ–छ जातका धानको बिउ प्रयोग गर्दै आएका छन् ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
