सहकारी संस्थाहरुको विकासमा स्थानीय सरकारले ध्यान नदिएको सहकारी अभियान्ताहरुले गुनासो गरेका छन् ।

शुक्रबार जिल्ला सहकारी संघ लि प्यूठानको आयोजनामा प्यूठानमा सहकारीहरुको अवस्था विषयक १ दिने अन्तरक्रिया कार्यक्रममा बोल्दै उनीहरुले जिल्लाका स्थानीय तहहरुले सहकारीको विकासमा ध्यान नदिएको गुनासो गरे । ‘स्थानीय तहहरुसंग आफ्नो पालिका/नगरमा कति सहकारी कस्तो अवस्थामा छन भन्ने तथ्यांक समेत छैन,’त्रिशक्ति महिला बचत तथा ऋण सहकारी संस्था भिंगृकी चुमा रोकाले भनिन, ‘सहकारीको डुबेको ऋण असुलीमा प्रशासन र स्थानीय सरकारले सहयोग गर्नुपर्छ ।’
सहकारी संस्थाहरुलाई स्थानीय सरकारले बजार व्यवस्थापनमा सहयोग गर्न सकेमात्र सहकारी संस्थाहरु फस्टाउन सक्ने ऐरावती बहुउद्देश्य सहकारी संस्था सरुमारानीका रेवतप्रसाद खनालले बताए । ‘ऐरावती बहुउद्देश्य सहकारी संस्थामा १ सय ७३ सदस्य छन्,’ उनले भने,‘ सदस्यहरुले बार्षिक ९ देखि १० टनसम्म मह उत्पादन गर्ने गरेका छन् । मह बिक्रिको लागि बजारको राम्रो व्यवस्था नभएका कारण सदस्यहरुले राम्रो आम्दानी लिन सकेका छैनन् ।’ प्यूठान नगरपालिका ८ कि पदमा पण्डितले जिल्लामा एउटा पनि चिस्यान केन्द्र सञ्चालनमा नभएका कारण कृषि सहकारीमा आबद्ध किसानहरुले धेरै दुःख भोग्नु परेको गुनासो गरिन । ‘हामीले उत्पादन गरेको कृषि उपज दाङ देउखुरी स्थित टिक्लीगढको चिस्यान केन्द्रमा पु¥याउनु पर्छ,’ उनले भनिन,‘यसले गर्दा किसानलाई आर्थिक भार थपिएको छ ।’ स्थानीय तहहरुसंग सहकार्य गरेर जिल्ला सहकारी संघ लिमिटेड प्यूठानले चिस्यान केन्द्र सञ्चालन गर्नका लागि पहल गर्न उनले आग्रह गरिन ।

जिल्ला सहकारी संघ लिमिटेड प्यूठानका अध्यक्ष शुशिल पोख्रेलको अध्यक्षतामा भएको कार्यक्रममा प्रमुख जिल्ला अधिकारी मदन कोइराला, नेपाल पत्रकार महासंघ प्यूठानका अध्यक्ष सञ्जय रिजाल, जिल्ला सहकारी संघ लिमिटेड प्यूठानका सल्लाहकार लोक बहादुर बस्नेत, जिल्ला बचत तथा ऋण सहकारी संस्था प्यूठानका अध्यक्ष भोज बहादुर बस्नेत, बिजय फुलबारी बचत तथा ऋण सहकारी संस्थाका व्यवस्थापक प्रकाश बैद्य लगायतले मन्तव्य राखेका थिए । कार्यक्रम बिजय फूलबारी बचत तथा ऋण सहकारी संस्था लिमिटेड प्यूठान नगरपालिका ३ नयाँ बजारको सभाहलमा भएको थियो ।