हिन्दू धर्मावलम्बीहरूको दोस्रो ठूलो पर्व तिहार घर आँगनमा भित्रीरहँदा बजारमा चहलपहल बढेको छ । तिहार अथवा शुभदीपावलीको शुरुवातसँगै किनमेलका लागि बजारमा मानिसहरुको चहलपहल बढ्न थालेको छ । साथै तिहार मनाउनको लागि घर फर्किनेको संख्या पनि उत्तिकै बढेको छ । तिहारको रमझम बढेसँगै जिल्लाका मुख्य बजार क्षेत्र बिजुवार, बाग्दुला लगायतका ठाउँमा तिहारका लागि सामान किनमेल गर्नेहरुको घुइँचो बढेको हो । प्यूठानका मुख्य व्यापारिक केन्द्रहरुमा यतिबेला भिडभाड छ ।

तिहारको पुर्वसन्ध्यामा किनमेलका लागि गाउँबाट बजार झरेका स्थानीयको घुइचो देखिन्छ । बैंक देखि लिएर खाद्यान्न, भाडा पसल, फेन्सी, इलेक्ट्रोनिक पसल लगायतका ठाउँमा भिडभाड छ । तिहारमा चाहिने सामग्री किनमेल गर्न निस्कनेको संख्या बढेकोले भिडभाड बढेको हो । माटाको पाला, रङ, झिलिमिलि बत्ती, फूलका माला, भाँडाकुँडा, कपडालगायत अन्य सामग्री किन्नेको भिड लागेको छ ।