राष्ट्रिय जनमोर्चाका उपाध्यक्ष तथा पूर्व सांसद दुर्गा पौडेलले लेनिनले गरेको सकारात्मक कार्य कम्यूनिष्ट पार्टीको लागि महत्वपूर्ण भएको बताएकी छिन् । आइतबार लेनिनको शताब्दी स्मृति दिवसको अवसरमा नेकपा (मसाल) ले प्यूठान नगरपालिका २ स्थित बाल मन्दिरमा आयोजना गरेको अन्तरक्रिया कार्यक्रममा बोल्दै उनले यस्तो बताएकी हुन् । बाहिर विभिन्न नकारात्मक भ्रम फैलाएको भन्दै लेनिनको अनुसरण गर्दै कम्यूनिष्ट पार्टी बलियो बनाउन मोर्चाको आवश्यकता भएको पनि उनले बताईन् ।

कार्यक्रममा बोल्ने बक्ताहरुले सबै क्रान्तिक्रारीहरुलाई लेनिनको योगदानको विषयमा प्रचारप्रसार तथा लेनिनको अनुसरण गर्न आवश्यक रहेको बताएका छन् । पार्टीभित्र गुटबन्दी हुने कार्यलाई निरुत्साहित गर्नको लागि कम्यूनिष्टको सिद्धान्त, विचार र लेनिनको सिद्धान्तलाई लिएर अघि बढ्न आवश्यक भएको बताएका थिए ।

नेकपा (मसाल) का जिल्ला प्रवक्ता राम पहाडीको अध्यक्षतामा भएको कार्यक्रममा, नेकपा (माओवादी केन्द्र) का केन्द्रिय सदस्य तथा संविधान सभा सदस्य नारायण प्रसाद अधिकारी, नेकपा (मसाल) लुम्बिनी प्रदेश पार्टी प्रवक्ता तिलक जि.सी, राष्ट्रिय जनमोर्चा जिल्ला अध्यक्ष ज्ञामुराम न्यौपाने, नेकपा एकिकृत समाजवादीका प्रतिनिधि खिम बहादुर वि.क, पार्टी कार्यकर्ता, पत्रकार लगायतको सहभागिता रहेको थियो ।